Siglir tar il cuntegn
cuntegn

Ulteriur Grischun Ferma critica cunter Martin Jäger

A la radunanza generala da l'Uniun grischuna d'art è il cusseglier guvernativ Martin Jäger vegnì crititgà fermamain per ses agir en connex cun la reorganisaziun da la direcziun dal Museum d'art.

Legenda: Guardar il video Causa Kunz. Durada 03:06 minutas.
Or da Telesguard dals 27.06.2017.

La societad purtadra dal Museum d'art – l'Uniun grischuna d'art – ha tegnì glindesdi saira sia radunanza generala a Cuira. En connex cun la restructuraziun da la direcziun dal Museum d'art e la causa Kunz èn vegnidas fatgas dumondas criticas al cusseglier guvernativ Martin Jäger. Respostas n'ha el dà naginas, las dumondas vegnian pir examinadas ils proxims dis. Pliras giadas ha Jäger stuì prender encunter cloms da «buh» durant la radunanza generala da l'Uniun grischuna d'art.

Hans Hatz sco mediatur

L’anteriur president da la Banca Chantunala Grischuna e commember dal cussegl administrativ da la Societad per la perscrutaziun da la cultura grischuna Hans Hatz vegn ad accumpagnar ils discurs ed era a manar sez discurs cun persunas pertutgadas directamain. Sco il chantun scriva, sperian els da pudair chattar svelt ina soluziun adattada per il Museum d’art dal Grischun e cun Hatz hajan ins chattà ina persuna neutrala e cumpetenta.

Jäger vegn a manar discurs

Ils discurs previs en connex cun la reorganisaziun da la direcziun dal Museum d'art vegnian manadas dal cusseglier guvernativ Martin Jäger. Era vegnia en questa segunda fasa d’analisa la vista schlargiada ed uschia possian era gruppas externas s’integrar en ils discurs ed era purtar lur interess en chaussa, scriva il departament.

La finamira saja da manar discurs consultativs cun las gruppas e cun las organisaziuns culturalas dal chantun. Las valitaziuns possian uschia vegnir integradas en l’analisa cumpletta, scriva il chantun. Ils discurs sajan gia en planisaziun.

RR actualitad 07:00