Siglir tar il cuntegn
Inhalt

Ulteriur Grischun Exposiziun annuala d'artists grischuns a Cuira

Mintg’onn organisescha il Museum d’art dal Grischun a Cuira in’exposiziun be cun ovras grischunas. Artistas ed artists dal chantun pon inoltrar fin trais ovras, ch’els vulan exponer. L’exposiziun duess esser ina plattafurma per l’art indigena.

134 artistas ed artists èn s'annunziads quest onn per l’exposiziun. S'annunziar po mintgin ch'è dal Grischun u ha ina relaziun speziala cun il chantun. La giuria che sa cumpona da dus commembers da l’Uniun grischuna d'art, dus artists externs e la curatura dal Museum d’art da Son Gagl, tscherna silsuenter lur favurits. Quest onn èn quai 32 artists. Ils objects han il co-directur dal Museum d’art Stephan Kunz exponì sin il segund plaun.

Sculpturas e purtrets, simpels ed abstracts

L'art n'è betg mo visibla, mabain er udibla. Ils utschels che tschivlan cura ch’ins va da la stgala giu èn l'emprim object d’art: La paraid è cuverta dad in mantun da feglia cotschna, melna e brina accumpagnada dad in versin tar il tema furtina.

In’ovra ins pudess bunamain survesair: in toc chartun vi dal rom da l’isch. Sin quel è notà il num da l’artist, sia annada e co che sia ovra ha num. In'ovra na chatt’ins però betg, il chartun è numnadamain l’ovra. Era quai sa esser art grischun.

RR actualitad 08:00