Cunter la gruppa che sa cumponiva da Uwe Mundlos, Uwe Böhnhardt e Beate Zschäpe vegn actualmain processà a Minca. Beate Zschäpe è l'unica da la gruppa che n'ha betg fatg suicidi.
La gruppa NSU ha tranter auter sblundregià pliras bancas en ils onns 90 ed a partir da l'onn 2000 fin il 200f6 assasinà 9 persunas cun biografia da migraziun.
Dà lavur a Mundlos e Zschäpe?
Tenor las retschertgas da la gasetta «Die Welt» duai Ralf Marschner avair emploià Uwe Mundlos en sia fatschenta da bajegiar ed eventualmain er Beate Zschäpe en ina da sias stizuns da la scena dretga. E quai tut durant il temp che la gruppa terroristica era activa e Ralf Marschner sez era engaschà da la protecziun da la constituziun (servetsch secret) sco informant.
Ralf Marschner sez n'ha betg vuli prender posiziun al radio. Envers la gasetta «Lichtensteiner Vaterland» ha el dentant dementà tut las accusaziuns. El n'haja mai gi contact cun ils commembers da la gruppa NSU. Las medias maldrovian uss sia persuna per far attent sin tut quai che n'haja betg funcziunà en il sistem dal stadi da lezzas uras.
En Svizra pervi da problems cun la scena dretga en Germania
Ralf Marschner è stà activ en la scena dretga da la Germania a partir dals onns 90. La protecziun da la constituziun ha dentant adina tolerà quai, perquai che Marschner saja stà in in bun informant.
Enturn il 2007 ha Marschner lura gi problems cun la scena dretga en Germania e sias fatschentas na gievan er betg pli bain. Uschia è el vegni sur l'Irlanda e l'Austria en Svizra. L'emprim ha el manà ina stizun en la staziun da Cuira ed il 2015 ha el lura fundà ina firma da transport, commerzi cun antiquitads e da rumida a Zezras. Tenor indicaziuns en divers registers da commerzi na para questa fatschenta dentant er betg da marschar bain.
Dasper sia fatschenta a Zezras organisescha Ralf Marschner sut il pseudonim «Kit Rock» tranter auter concerts da punk a Zezrras.
Betg activ en la scena dretga da la Svizra
Sche e quant contact che Ralf Marschner ha anc oz cun la scena dretga n'è betg cler. Cler è dentant ch'el simpatisescha anc adina cun il naziunalsocialissem. Plinavant ha la Polizia chantunala dal Grischun confermà sin dumonda dad RTR ch'i na sajan betg dadas en egl activitads da la scena dretga e ch'il servetsch secret tegnia en general en egl tals cas.
Gia il 2009 a Cuira
Il 2009 manava Ralf Marschner ina stizun da chalzers ed urden per skaters a Cuira.
Ina contribuziun dal Telesguard dals 15 da december 2009:
