Siglir tar il cuntegn

Header

In chau da sondagi.
Legenda: En las muntognas n’èn las cundiziuns per la geotermia betg uschè idealas. Keystone
cuntegn

Ulteriur Grischun Emprim project da geotermia en las muntognas

Las cundiziuns per indrizs geotermics en regiuns alpinas n'èn betg uschè bunas. A Tavau èsi dentant auter.

Tar la geotermia tiran ins a niz la chalur che è en l’intern da noss planet. Ils endriz per far quai sa chattan per gronda part en la Islanda ni en la California. Las cundiziuns perseutner n'èn en il territori alpin betg uschè bunas. Tuttina èsi a Tavau in zic auter.

En las muntognas n’èn las cundiziuns betg uschè idealas: ins è cun l’autezza sur mar memia lunsch davent dal coc chaud da la tiara. Pertge pli bass ch’ins fora, e pli chaud ch'ì vegn.

Il medem è quai cun l’aua. Uschia han ins era chattà in lai sutterran a Tavau. Quel sa chatta radund 250 meters sut la vischnanca e sa derasa sin in kilometer. L’aua giu là è 11.4 grads chauda e stat sut pressiun. Cun ina pitschna fora che colliescha il lai sutteran cun in endriz geotermic vegn quest aua da sezza a la surfatscha.

Energia per 90 chasadas

1'240 liters aua pro minuta vegnan si da la fora. Aua ch’ins po duvrar per far energia. Cun l’implant che vegn prendì en funcziun, cura che la stagiun da hockey sin glatsch è a fin. Sur ina pumpa da chalur, che sa chatta en la halla da glatsch a Tavau, pon ins alura producir energia per 90 chasadas.

Dentant è quai il mument mo ina fasa da test. Sch’ils resultats restan fin 2017 buns, lura pon ins sperar sin ina lubientscha a lunga vista. Tavau pudess uschia daventar in exempel per autras regiuns muntagnardas che pudessan era producir uschia atgna forza electrica.