Siglir tar il cuntegn
cuntegn

Ulteriur Grischun Ed els curran tuttina anc ina giada quest onn

Suenter ch'ils organisaturs han stuì dir giu las duas fin d'emnas passadas las cursas da chavals pervi da l'aura ha la suprastanza da l'uniun da cursas Maiavilla/Bogn Ragaz decidì da far la dumengia proxima en total otg cursas. I dettia in areal da cursa pli pitschen ed in manaschi d'ustaria adattà.

Legenda: Guardar il video Maiavilla: Ils chavals duain currer tuttina. Durada 02:15 minutas.
Or da Telesguard dals 10.10.2017.

La suprastanza da l'uniun da cursas Maiavilla / Bogn Ragaz ha decidì da far la dumengia proxima en total otg cursas. I vegn manà tras duas cursas al trot, duas cursas senza impediments e quatter cursas cun impediments. Eveniment principal è la dumengia la cursa da cross sur 5,4 km, il «Grond Premi da Maiavilla». Ins spetgia en total 80 starter.

Manaschi d'ustaria adattà

Il motto da las cursas da chavals da la proxima dumengia è «Enavos tar las ragischs». La tribuna e la tenda da festa vegnan remplazzads cun in manaschi d'ustaria redimensiunà: L'offerta saja survesaivla ed ils pretschs moderats, pia in ambient che regordia a temps passads.

Il futur da las cursas da chavals è dentant intschert

Gia suenter che l’emprima dumengia da cursa ha stuì vegnir annullada, avevan il responsabels discurrì dad in avegnir pli che malsegir da las cursas da chavals tradiziunalas sin il Rossriet.

Davos il futur da las cursas met jau simplamain blers segns da dumonda.
Autur: Ruedi Niedererpresident dal comité d'organisaziun

Era segunda dumengia da cursa ha stuì vegnir annullada

Suenter la decisiun da l'emna passada avevan ils organisaturs atschertà, da far tut per pudair far la segunda dumengia da cursa e realisar uschia almain ina da las duas dumengias da cursa da la 61avla ediziun da las cursas da chavals a Maiavilla. L'aura als ha dentant fatg anc ina giada in stritg tras il quint.

Ruedi Niederer: «Fitg trist!»

La plievgia haja lomià il terren a tala moda, che las cursas na sajan betg pussaivlas. La segirezza dals chavals e dals chavaltgaders na possia uschia betg vegnir garantida. Quai han communitgà ils organisaturs gia curt avant gentar.

Per il president dal comitè d'organisaziun, Ruedi Niederer, èsi fitg trist da stuair annullar suenter l'emprima er la segunda dumengia da cursa previsa per quest onn. Quai na saja anc mai stà necessari, uschia Niederer envers RTR.

RR novitads 09:00

Cursas da chavals a Maiavilla…

Cursa da cross Maiavilla.
Legenda: Cursa da cross, Maiavilla. Keystone

… datti dapi il 1956. Quest onn fiss stada la 61avla ediziun sin il Rossriet. Sper Aarau vala Maiavilla sco center da cursas da cross. Punct culminant è il Grond Premi da la citad da Maiavilla: El è cun 25’000 francs premia la cursa da cross pli aut dotada en Svizra. A dumengias da bell’aura attiran las cursas radund 20’000 aspectaturs.