Eclat en la plaiv evangelica da Cuira

La presidenta da la plaiv evangelica da Cuira Carmen Dasoli-Peter abditgescha per immediat. Quai suenter che la cumissiun da recurs da la baselgia evangelica refurmada dal Grischun ha refusà in recurs. Il cussegl stat tar sia posiziun che Carmen Dasoli-Peter na saja betg elegibla a Cuira.

Il clutger da la baselgia S. Martin a Cuira.

Legenda da maletgs: Il temp ha lavurà cunter la plaiv evangelica da Cuira en chaussa da lur presidenta. RTR, F. Cajochen

E cun la presidenta sa retira era l’entira suprastanza da la plaiv evangelica da Cuira sin la fin dal zercladur. Cun la decisiun dal Cussegl da la baselgia evangelica refurmada dal Grischun da l’october passà saja il bainstar da la plaiv periclità, ella saja fitg dischillusa, scriva la suprastanza. L'onn passà aveva il cussegl chantunal renvià d’acceptar l’elecziun da Carmen Dasoli-Peter a Cuira, damai ch'ella viva dapi in temp a Trin e betg a Cuira.

Betg pussaivel da trair vinavant la decisiun

Sco che la suprastanza scriva vinavant, deplorescha ella l’abdicaziun immediata da Carmen Dasoli-Peter. Cun quest pass vul la presidenta metter ina fin a la dispita tranter la baselgia chantunala e la plaiv da Cuira. Questa demissiun impedescha da trair vinavant la decisiun a la Dretgira administrativa grischuna. Tenor la suprastanza da la plaiv evangelica da Cuira avess in tal recurs gì bunas schanzas. Visavì RTR n' han Dasoli-Peter e la suprastanza betg vulì prender posiziun avant la radunanza dalla plaiv, che ha lieu ils 13 da zercladur.

In curatur duai organisar novas elecziuns

«Damai che la suprastanza demissiunescha in corpore vegnin nus suenter a metter en in curatur», declera Andreas Thöny, il president dal cussegl dalla baselgia evangelic-refurmada grischuna. Quai muntia che questa persuna prendia enta maun las fatschentas ed obtegnia er cumpetenzas da decider. «Questa persuna vegn era incumbensada d' organisar novas elecziun usche svelt sco pussaivel.» Cura che quai vegnia lura ad esser il cas na po Thöny dentant anc betg dir.

RR novitads 14:00