Siglir tar il cuntegn
cuntegn

Ulteriur Grischun «Dr Bus vu Chur» ha transportà 9 milliuns passagiers il 2016

Ils bus da Cuira han fatg l'onn passà ina svieuta da 22,2 milliuns francs e transportà bunamain 9 milliuns passagiers. Il gudogn munta l'onn 2016 a 46'161 francs. Quai ha la «Stadtbus Chur SA» communitgà a la radunanza generala. Era ha ella preschentà la bilantscha da l'enquista «happy or not».

Dapi il mars porschan ils bus ina pussaivladad da dar in feedback direct cun l'enquista «happy or notۛ». Ils emprims resultats dapi lura mussan che la cuntentientscha dals clients è tar 80%. En tut hajan 74’410 persunas smatgà in dals nufs, di Ralf Kollegger. Els sajan fitg cuntents cun quest resultat. Il resultat na saja dentant betg da vesair sco cifra absoluta mabain plitost sco tendenza. Pertge quest sistem vegnia era a ses cunfins e passagiers possian tut tenor malduvrar il sistem cun smatgar pliras giadas ils nufs.

Er persvader quels che n’èn betg cuntents

Tuttina – bun 20% dals passagiers hajan smatgar in nuf negativ ed exact quels less Kollegger anc persvader. Sper scolaziuns internas e megliuraziuns da l’urari metta il bus da Cuira dapli paisa sin la communicaziun en il bus. Ina champagna duai far attent la glieud sin las reglas en in bus. La strategia na saja dentant betg da lavurar cun scumonds mabain plitost cun avis simpels ed er divertents. Uschia datti da vesair a partir dad immediat flyers e tatgaders en ils bus che decleran cun comics tge che mintgin duai resguardar.

Tatgadar en il Bus da Cuira che mussa ina da las reglas dal bus - schar seser persunas attempadas.
Legenda: In dals tatgaders da la champagna «freundlich unterwegs». RTR, Selina Chistell

Nova campagna «curtaschaivel sin viadi»

Il medem mument ha l'interpresa gist lantschà la campagna «curtaschaivel sin viadi». Cun questa campagna vul la Stadtbus Chur communitgar sin moda lucca tips e trics per far il viadi pli cumadaivel.

RR novitads 11.00