Siglir tar il cuntegn

Header

Navigaziun

Bus.
Legenda: La Deutsche Bahn fa concurrenza a l'SBB cun bus da ed a Cuira. SRF
cuntegn

Ulteriur Grischun Deutsche Bahn trametta bus a Cuira

Dasper Flixbus è uss er la Deutsche Bahn preschenta sin il martgà da bus a lunga distanza en Svizra. E quai senza participaziun da l'SBB. Il chantun Grischun vegn cunzunt ad integrar il bus en il sistem da tariffas.

  • La Deutsche Bahn porscha da nov bus a lunga distanza da ed a Cuira.
  • Quai senza ses partenari l'SBB.
  • Uschia è la Deutsche Bahn dasper Flixbus gia il segund purschider ester en quest segment lucrativ.
  • Ils bigliets da bus custan be 1/4 ch'ils bigliets da tren.
  • Tenor il chantun Grischun servia questa purschida al turissem.

La Deutsche Bahn vul sa participar al martgà da bus a gronda distanza svizzer. A partir da l’avrigl porscha ella mintga di fin duas colliaziuns da bus tranter Cuira e Milaun e tranter Cuira e Minca. Il viadi cun il bus duai cuzzar radund 3 1/2 uras. Quai è passa in'ura pli spert ch'il tren.

Sco quai che SRF ha rapportà, èn ils viadis cun il bus fin quatter giadas pli favuraivels che las colliaziuns da tren. Las Viafiers federalas svizras n’èn tenor atgnas indicaziuns betg participadas a questas novas colliaziuns da bus. Tant l'SBB sco er la Deutsche Bahn na vulan però betg discurrer da concurrenza.

Fin ussa porscha la Deutsche Bahn be ina colliaziun da bus en Svizra da Minca a Turitg. Quai en collavuraziun cun l’SBB.

Chantun è intgantà

Il chantun Grischun sa legra da la nova purschida. Quella servia numnadamain al turissem, ha ditg Erich Büsser, il parsura da l’Uffizi d’energia e da traffic dal Grischun. La collavuraziun cun la Deutsche Bahn vegnia ad esser pli stretga che quella cun Flixbus che circulescha medemamain da Cuira a Minca ed a Milaun.

L’uschenumnà «IC-Bus» vegnia integrà en il sistem da tariffas grischun, uschia Büsser vinavant. Uschia saja p.ex. pussaivel da viagiar da Minca a San Murezzan cun in sulet bigliet. Ins possia midar a Cuira dal IC-Bus sin la Viafier retica senza stuair cumprar in ulteriur bigliet.

RR novitads 06:00