Siglir tar il cuntegn
Inhalt

Ulteriur Grischun Davaz expandescha: «Rimuss» duai daventar grischun

L'interpresa da tradiziun «Davaz» a Fläsch surpiglia la producziun e la distribuziun da la Rimuss e la Weinkellerei Rahm SA. Quai scriva la Davaz Holding en ina communicaziun a las medias.

Vignas a Fläsch.
Legenda: Il nov da chasa da Rimuss – La «Davaz» a Fläsch vul surpigliar la Rimuss- e Weinkellerei Rahm SA. mad

La firma da tradiziun «Davaz» da Fläsch ha annunzià il mardi, ch'ina decleraziun d'intenziun per surpigliar la Rimuss- e Weinkellerei Rahm SA da Hallau (SH) saja suttascritta. Questa cunvegna furmia la basa per pudair mantegnair «persistentamain» la producziun e las 45 plazzas da lavur a Hallau.

Betg be «Rimuss», ma radund 40 products dad ivas

La Weinkellerei Rahm SA è enconuschenta en emprima lingia pervi da ses prosecco senza alcohol, il «Rimuss». L'interpresa da famiglia elavureschia, produceschia e vendia en tut radund 40 «products dad ivas dad auta valur», scriva la Davaz Holding en sia communicaziun.

Cun 50 collavuraturs ed ina svieuta annuala da 32 milliuns francs tutga la Davaz Holding SA tar ina da las pli grondas interpresas da vin da la Svizra.

RR novitads 15:00

La Davaz Holding SA

L’interpresa da famiglia emploiescha 50 persunas e fa cun vin ina svieuta da 32 miu. ad onn. La gruppa vegn presidiada da viticultur e cusseglier grond Andrea Davaz (PPS). Tar ella tutgan il bain da viticultura a Fläsch e las vignarias «von Salis SA» (Maiavilla e Landquart), «wine ag, Valentin & von Salis» (Puntraschigna) e «Zanolari SA» (Cuira).