Siglir tar il cuntegn
Inhalt

Ulteriur Grischun Dapli polizia per Cuira

Il parlament da la citad ha decis da rinforzar il corps da polizia da Cuira per sis persunas. El augmenta uschia il dumber da plazzas da policistas e policists da 78 sin 84.

Dus policists en il Welschdörfli.
Legenda: La polizia da citad da Cuira duai survegnir sustegn per survegliar lieus neuralgics. Keystone

La decisiun dal parlament è stada clera: El ha decis cun 19:2 vuschs per l’augment. Tenor la gasetta Bündner Tagblatt BT veglia la polizia da citad reagir uschia en emprima lingia sin ils midaments da la situaziun da segirezza en l’Europa centrala ed ils basegns da segirezza pli auts da la populaziun. En pli duaja vegnir garantida la preschientscha a lieus neuralgics ed en ils quartiers.

Betg fats, ma «percepziun subjectiva»

Sulettamain la glista libra era cunter l'augment, scriva il BT. Las adversarias dal augment hajan crititgà, ch’i vegnia decis sin basa dad ina «percepziun subjectiva» e betg da fats.

Betg simpel dad er chattar sis persunas novas

Il president da la citad, Urs Marti, haja sa mussà cuntent da la decisiun, al citescha il BT. Al medem mument haja el dentant rendì attent che chattar il persunal correspundent na vegnia betg ad esser simpel, cunquai ch'i vegnia il mument augmentà ils corps da polizia en l'entira Svizra.

RR novitads 06:30