Siglir tar il cuntegn

Ulteriur Grischun Dapli Kirchner, dapli Giacometti, dapli Amiet per il museum d'art

L'augment succeda grazia a la fundaziun Werner Coninx. Quella surdettia al museum d'art dal Grischun bunamain 1'000 ovras en emprest permanent, scriva l’Uffizi da cultura il mardi avantmezdi.

il maletg.
Legenda: «Mit Schilf werfende Badende» (1909) ina da 94 ovras dad Ernst Ludwig Kirchner ch'il museum po integrar en sia collecziun. mad

La fundaziun Werner Coninx surdettia al museum d'art dal Grischun sco emprest permanent ina gronda part da sia collecziun grafica impurtanta, scriva l’uffizi en sia communicaziun. I sa tractia da bunamain 1000 ovras da Cuno Amiet, Giovanni Giacometti, Ernst Ludwig Kirchner, Erich Heckel, Max Beckmann, Hermann Scherer, Johann Robert Schürch ed auters.

Per il museum d'art dal Grischun è quai ina da las extensiuns las pli impurtantas e las pli voluminusas insumma da la collecziun.

Fundaziun Werner Coninx tschertgava nov da chasa

Cun quai che la fundaziun Werner Coninx ha serrà ses museum privat a Turitg avant 3 onns haja ella tschertgà alternativas per pudair render accessiblas sias ovras er vinavant al public. Uschia haja ella fatg cunvegnas cun differents museums en Svizra – per exempel cun la chasa d'art da l'Argovia ad Aarau, il museum d'art a Winterthur u il museum Rietberg, scriva l'uffizi.

Il maletg.
Legenda: Ernst Ludwig Kirchner: «Englische Steptänzerinnen» (1911) mad

Museum d'art dal Grischun ha survegnì la collecziun grafica

Ina da las parts las pli preziusas da la collecziun da Werner Coninx furmia da vegl ennà la collecziun grafica cun ovras da l'expressiunissem svizzer e tudestg. Quella è uss ida al museum d'art dal Grischun – cun quai ch'el possedia gia ina collecziun extraordinaria d'ovras expressiunisticas.

Las ovras èn vegnidas acquistadas per gronda part enturn l'onn 1960, cur che Werner Coninx fascheva regularmain offertas a las aucziuns da la gallaria Kornfeld a Berna e cumprava savens ovras d'exposiziuns da relaschs.

Stephan Kunz: «Gronda fortuna»

L'emprest permanent «accentuescha vinavant la collecziun d'ovras expressiunisticas ed en spezial auza el la collecziun cun lavurs sin palpiri sin in nivel fitg aut.» vegn cità Stephan Kunz, il co-directur e manader artistic dal museum d'art dal Grischun, en la communicaziun. Kunz haja fatg la cunvegna cun la fundaziun Werner Coninx per surpigliar il deposit.

Verer las novas ovras

Singulas ovras da la collecziun da Werner Coninx pon ins contemplar a partir dals 10 da matg 2018 en la Villa Planta ed en l'exposiziun «Focus GRafica».

RR novitads 12:00+