Siglir tar il cuntegn

Ulteriur Grischun Dapli gudogn per l'Ospital chantunal a Cuira il 2017

L'Ospital chantunal dal Grischun ha nudà in legraivel onn da gestiun cun in gudogn da 30 milliuns francs. Quai è in plus da 4 milliuns francs cumpareglià cun l'onn avant. La svieuta è s’augmentada il 2017 per 10 milliuns francs sin 345 milliuns francs.

Grond plazzal.
Legenda: Plazzal da l'Ospital chantunal a Cuira. RTR, Rafael Müller

En total ha l’Ospital chantunal a Cuira tractà l'onn passà 17’461 pazientas e pazients staziunars. Cumpareglià cun l’onn avant è quai in lev minus da 0,93%. Percunter èn ils cas ambulants s’augmentads per radund 6,6% sin 75’586. Vitiers hai dà 1’063 naschientschas. Quai ha communitgà l'Ospital chantunal dal Grischun.

Scolaziun e furmaziun fitg impurtant

Sco quai che l’ospital scriva vinavant, giaudian la scolaziun e la furmaziun ina gronda stima. Radund in quart dal persunal haja fatg l'onn passà ina scolaziun u ina furmaziun.

Il 2017 ha l’ospital chantunal era pudì festivar ina medaglia d'aur. La collavuratura Irina Tuor è vegnida campiunessa mundiala als «World Skills» ad Abu Dhabi en la sparta sanadad e tgira.

Era la construcziun dal bajetg nov, la chasa H1, saja sin buna via. Ins quintia da pudair retrair il bajetg l’atun 2019.

RR novitads 12:00