Siglir tar il cuntegn
Inhalt

Ulteriur Grischun «Cuntent qua, ma la brama resta»

Il pli grond giavisch da Youseef Youssef è quai, che la guerra burgaisa en sia patria, la Siria, giaja a fin e ch'el possia returnar cun sia famiglia. Ensemen cun sia dunna Fatima e ses figl Mohamed e la figlia Fidan viva Youseef dapi il 2009 en il Grischun.

La famiglia Youssef.
Legenda: La famiglia Youssef en l'abitaziun a Schiers. RTR, H. Schär

Dapi 5 onns en in'abitaziun en il center da Schiers. El e sia famiglia sa senta bain, ha dentant la brama da pudair returnar in di.

Fugida è la famiglia Youssef perquai ch'ils Curds en la Siria vegnan persequitads. El haja cumenzà a far plans per fugir cunquai che la polizia siriana haja adina dumandà suenter pli stedi. Tenor il bab da famiglia da 42 onns saja en Siria tut quai dals Curds scumandà, lur lingua, lur cultura, lur musica. I saja vegnì pli e pli privlus ed uschia sajan els sa decis per la fugia.

Ich hoffe diese Krieg dann fertig, alle müssen zurück gehen in ihr zuhause und dann mache wieder Syria gut. Das ich hoffe, das ich bruucha.
Autur: Youseef Youssef

Els han prendì sut ils pes la via en la Tirchia ed en Grezia. Davent d'Athen hajan els prendì il bastiment a Venezia e lura sajan els viagiads vinavant cun tren fin a Chiasso. La dunna era lu en speranza da la figlia Fidan. Il 2009 èn els arrivads en il Grischun, l'emprim en il center da requirents d'asil a Cuira e pli tard en il Löwenberg a Schluein.

Dapi la decisiun positiva ch'els astgan star en Svizra abitescha la famiglia a Schiers. Il figl va en la tschintgavla classa, ha blers collegs e dat era ballape cun ils juniors da Landquart. Il bab lavura actualmain en sia professiun d'origin sco chalger d'ortopedia. El lavura a Panaduz. La mamma è dunna da chasa e la figlia Fidan va en scolina.
Els sa sentian bain e sajan fitg engraziaivels, ma lur pli grond giavisch fiss da pudair returnar en la Siria.