Siglir tar il cuntegn
cuntegn

Ulteriur Grischun Cumprar ils regals da Nadal – stressant u patgific?

Regals sut il pignol da Nadal tutgan per blers simplamain tar la festa. Bun duas emnas ha la glieud anc peda da chattar ils regals adattads. Nus essan stads en il City West a Cuira ed avain guardà, schebain blers èn en il stress da las cumpras da Nadal.

L'atmosfera è stada patgifica durant la vendita da dumengia en il City West.
Legenda: L'atmosfera è stada patgifica durant la vendita da dumengia en il City West. RTR, GIAN CARLO CANDINAS

Tastgas plainas, emplenidas cun cudeschs, chaussas electronicas u termagls d’uffants: Durant il temp d’advent in maletg usità en las stizuns.

Era en il City West a Cuira han ins vesi la dumengia durant la vendita da dumengia quest maletgs. Spezialmain bleras famiglias èn stadas en il center da cumpra per cumprar regals.

Resumà era l’atmosfera dentant fitg patgifica ed insumma betg stressada. La blera glieud ha simplamain giudì l’atmosfera da Nadal.

Far patgific cun leger in cudesch

In maletg ch’è sa mussads savens la dumengia en il City West, è quel da persunas che spetgavan sin in banc sin lur famiglia.

Atmosfera da Nadal en il center da cumpra «City West» a Cuira.
Legenda: Atmosfera da Nadal en il center da cumpra «City West» a Cuira. RTR, GIAN CARLO CANDINAS

In um e bab da famiglia ha declerà, ch’el haja gia daditg fatg las cumpras da Nadal. «Jau cumprel tut ils regals durant l’onn». Uschia hajan ins mai stress da Nadal.

In auter um ha declerà, ch’el haja fatg tut las cumpras da Nadal via internet. Quai saja pli simpel ed uschia na stoppian ins currer atras las stizuns.

RR actualitad 08:00