Siglir tar il cuntegn
cuntegn

Ulteriur Grischun Culp da partenza per il Parc natiral Reticon

Las vischnancas da Grüsch - Claustra - Küblis - Luzein - Schiers e Seewis han dà glisch verda per in studi davart la realisabladad. Quai tenor communicaziun da pressa dal svilupader regiunal dal Partenz.

Parc natiral internaziunal Reticon en il Partenz.
Legenda: Culp da partenza per il Parc natiral Reticon en il Partenz: Vista sin il piz Schesaplana. MAD/Manuel Siegrist

Il studi davart la realisabladad dal parc duai dar resposta sin suandantas dumondas:

  • Tge porta in Parc natiral internaziunal?
  • Tge schanzas e potenzials pon vegnir nizzegiads?
  • Co pudess ins organisar e finanziar il Parc natiral internaziunal ensemen cun il Vorarlberg ed il Principadi dal Liechtenstein?

Las vischnancas da Grüsch - Claustra - Küblis - Luzein - Schiers e Seewis han dà glisch verda al studi che vegn finanzià ensemen cun la Confederaziun ed il chantun. Il document vegn elavurà da la gruppa da perscrutaziun per turissem e svilup perdurabel da la Scol'auta turitgaisa per scienzas applitgadas (ZHAW) a Wergenstein.

Finamira principala

Las examinaziuns preliminaras han mussà che la noziun da la Confederaziun «Parc natiral regiunal» ha chaschunà per malenclegientscha en la publicitad. Dentant in parc natiral n'è betg in parc naziunal. Il parc natiral na chaschuna naginas ulteriuras prescripziuns da protecziun u scumonds e restricziuns per l'entir territori.

La finamira dal Parc natiral Reticon saja in svilup persistent. Tant il turissem sco era l'agricultura, il mastergn e la populaziun duajan profitar dal project internaziunal. Internaziunal perquai ch'era il Vorarlbern en l'Austria ed il Principadi dal Liechtenstein duain sa participar.

RR novitads 10:00