Siglir tar il cuntegn
cuntegn

Ulteriur Grischun Cuira: Tschaiver è stà paschaivel

A Cuira han sonda radund 28'000 persunas guardà il til da tschaiver tras la chapitala tar fina bell'aura.

via cun confettis e butteglias da plastic giun plaun
Legenda: Suenter il til da tschaiver cun 28'000 visitaders fan las colonnas dal lavuratori da Cuira lur lavur. RTR, Gian-Marco Maissen

A partir da las 14:00 èn 44 furmaziuns stadas da viadi tras la citad da Cuira. Punct culminant è stà il «concert da monster» sin il Kornplatz. Sco quai che la polizia da Cuira communitgescha, saja il concept da segirezza sa cumprovà, ed i haja dà naginas incaps. Il concept han elavurà la polizia da Cuira e l'associaziun da tschaiver da Cuira.

Per la polizia da la citad tutga il til da tschaiver tar ina da las pli grondas acziuns da l'onn. Per dumagnar il traffic è ella perquai er avisada sin servetschs da segirezza privats.

La notg è stada paschaivla

La polizia da la citad scriva ch'i saja stà ina fin d'emna ruassaivla e per pli paschaivla. I haja da nagins incaps pli gronds. En tut sajan ils policists da la citad en collavuraziun cun la polizia chantunala stads 14 giadas en acziun la fin d'emna, scriva la polizia da Cuira. Dasper persunas sturnas haja dà plirs delicts da traffic, sco laschar ir memia dad aut il motor e dus cas da charrar sut influenza da drogas respectiv d'alcohol.

RR novitads 18:00