La fatschenta d'informatica e segirtad da banca ha survegnì il dretg da bajegiar sin il l'areal da l'anteriur lavuratori forestal a Cuira. Cun 84,6% da las vuschs è la decisiun stada fitg clera. Il president da Cuira Urs Marti vesa il gea sco ina schanza per la citad. D’ina vart possia Cuira sa sviluppar tar in lieu per fatschentas spezialisadas sin informatica e da l’autra vart procurian ils collavuraturs da la Inventx per vita el coc da la citad.
Nova vita per l'anteriur areal forestal
Il nov bajetg ch'i duai dar sin l'areal na duai betg mo porscher novas plazzas da lavur a la fatschenta ch'occupa il mument 140 lavurers, mabain duai era dar abitaziuns.
- En las duas auzadas suren (3+4), duessi dar 11 abitaziuns per affittar
- En las duas auzadas enamez (1+2) duessi dar biros da l'Inventx, cun plaz fin rodund 300 emploiads
- En il plaunterren duessi dar in restaurant u cantina, sco era ina halla ch'ins po duvrar per occurrenzas culturalas
- En il plaun sutteran datti il nov archiv da la citad da Cuira, sco era ina garascha d'autos
Sclerir dumondas da vischins
Sco Urs Marti di, dettia uss anc da sclerir singulas dumondas da vischins en connex cun l’autezza dal bajetg. Quai saja dentant sin buna via. «Sche tut va uss tenor plans san las lavurs da construcziun cumenzar questa stad».
RR novitads 13:30
