Cuira sid funcziuna, Cuira nord betg

Grazia a la nov'extrada cun la rundella sur l’autostrada curra il traffic uss bain tar la sortida Cuira sid. Cunquai n’èn dentant betg tut ils problems da traffic a Cuira schliads.

La nova rundella tar la sortida da l’autostrada Cuira sid.

Legenda da maletgs: La nova rundella tar la sortida da l’autostrada Cuira sid. RTR

Tar la sortida nord, da la vart cunter Landquart, vegni adina puspè tar colonnas che tanschan enfin giu sin l’autostrada. Quai po manar a situaziuns malsegiras.

Ina terza sortida per Cuira

Tenor il president da la citad da Cuira, Urs Marti, pudess ina schliaziun per quest problem ina terza sortida esser: ina nova sortida tranter las 2 existentas. Là fiss tenor Marti era avunda spazi avant maun. Ins haja dentant anc betg examinà las differentas variantas en detagl.

Varianta pli simpla

Tar l’Uffizi federal da vias vesan ins tenor Marco Ronchetti era ina varianta pli simpla. Ins pudess prolungar la sortida entras midar ina part dal vial da panna en in vial da sortida. Ronchetti spera dentant che la situaziun a Cuira nord sa megliereschia senza mesiras. Cunquai che la nova rundella funcziunescha bain, spera el che blers vegnian uss a duvrar la sortida sid enstagl la nord.