Las contractivas directas han fatg naufragi – dapi l'avrigl 2015 han las dus partidas negozià e negozià. In cumpromiss n'han els dentant betg chattà. La citad ha uss fatg ina fin perquai ch'els han stuì dar part a las interpresas da construcziun, sch'i vegnian a construir ils indrizs da sport dal project «Eisball» sco planisà u en etappas. Cun quai ch'i ha dà nagin cumpromiss vegn il stadion da bal a vair in retard da varga trais onns e mez.
Soluziun transitorica betg pussaivla
La fin finala saja betg stà pussaivel, da chattar in cumpromiss. La citad ha ils 17 da december 2018 anc purtà ina ultima proposta. Ils acziunaris da la halla d'ir a chaval avessan survegnì in'indemnisaziun da 300'000 per bandunar l'areal Obere Au sin ils 30 da zercladur 2020. Quai è dentant betg stà d'acceptar.
La citad da Cuira sa dapi l'entschatta che nus essan pronts dad ir davent da l'Obere Au – aber mo sche nus savain senza interrupziuns manar vinavant ina halla d'ir a chaval.
Il risico che i vess dentant dà recurs da terzas persunas ed uschia retardà la construcziun, pia betg finì sin zercladur 2020, fiss stà memia gronds. Ina soluziun transitorica fiss per la citad stada acceptabla, dentant betg per la SA halla d'ir a chaval.
Parcella a l'Untere Au vegn scrit or publicamain
Ma igl è dentant anc betg detg che i vegn tar nagina halla d'ir a chaval a l'Untere Au. La citad da Cuira ha confirmà, che la parcella a l'Untere Au vegn scritta or. Cura, gliez stà en las stailas. Cunquai che las contractivas cun la societad d'aczias da la halla d'ir a chaval han betg chattà ina soluziun, è la citad betg pli sut squitsch da temp.
La SA halla d'ir a chaval è uss, cunquai che las contractivas han fatg naufragi, in interessent sco tut ils auters per la parcella a l'Untere Au.
La SA halla d'ir a chaval spera che quai giaja tant pli spert. Uss èn els sut squitsch da temp. Il contract da dretg da construcziun vala fin l'onn 2023 e sin lura duess ina nova halla star. Hans-Ulrich Bürer conferma er ch'i saja lur giavisch da chattar in lieu a Cuira e la parcella a l'Untere Au saja opziun numer in. Uschia vegnan els er a s'inscriver per la parcella – mo uss èsi pussaivel ch'i dat er auters interessents. Ed la precedenza che la SA halla d'ir a chaval vess gì cun las contractivas directas cun la citad, lezzas èn crudadas.
RR Actualitad 12:00
