Siglir tar il cuntegn

Header

cuntegn

Ulteriur Grischun Cuira: Donns suenter ferma plievgia

La polizia da la citad da Cuira ha survegnì passa 100 cloms d'urgenza suenter la ferma plievgia da la notg passada. Ils pumpiers han stuì pumpar ora abitaziuns e garaschas inundadas e deliberar autos bloccads.

audio
Bunura: Acziun da pumpiers suenter inundaziuns a Cuira
ord Actualitad dals 15.08.2016.
laschar ir. Durada: 37 Secundas.

Ils pumpiers sajan stads en acziun cun 40 persunas per pumpar ora abitaziuns e garaschas inundadas e per deliberar autos bloccads. Persunas na sajan betg vegnidas blessadas, communitgescha la polizia da Cuira.

Ils pumpiers da la citad da Cuira eran circa davent da las 23:00 uras cun 40 persunas en servetsch. Els han obtegnì sustegn da la polizia, Manaschis industrials, lavuratoris communals sco era interpresas da construcziun e tgirachanals. Las lavurs da rumir han cuzzà fin la damaun marvegl.

Pumpiers ston metter prioritads

Tenor il cumandant dals pumpiers da Cuira Stefan Reutimann na saja quai en ina notg sco la passada betg uschè simpel da metter prioritads. Da principi emprovian els da far in cas suenter l'auter. La notg passada hajan dentant il museum d'art ed il museum da natira gì prioritad. Lura sajan er ils ospital u chasas da tgira objects da prioritad (dentant betg la notg passada) e lura vegnian las abitaziuns. Suenter quai vegnan lura garaschas, tschalers u vaus dad ascensurs. Tar uschè ferma plievgia sco la notg passada na saja quai dentant betg pussaivel da pumpar or dal tut l'aua pervia dal temp. Cun in u dus centimeters ston ils possessurs anc far quint cu ils pumpiers van puspè. Tge che pertutga la chanalisaziun che po betg pli tschiffar l'aua na sappian ils pumpiers dentant far nagut uschè Stefan Reutimann, qua vali dad avair pazienza.

RR novitads 06:00

Artitgels legids il pli savens