Siglir tar il cuntegn
Inhalt

Ulteriur Grischun Cuira dat gas cun l'areal da l'anteriur lavuratori forestal

L'IBC ch'è uss sin l'areal da l'anteriur lavuratori forestal mida a la plazza da gieus dal Quader, ma sutterran. L'Inventx surpiglia il plaz vegl da l'IBC e vul bajegiar da nov. En quest bajetg avessi lura er plaz per l'archiv da la citad e per intginas abitaziuns.

Purtret da l'areal a Cuira.
Legenda: Sin quest areal da l'anteriur lavuratori forestal da la citad da Cuira vul l'Inventx bajegiar. RTR, Lea Livers

L'IBC maina il mument ina centrala secundara sin l'areal da l'anteriur lavuratori forestal entamez la citad. Uschia ina centrala transfurmescha la tensiun electrica d'auta en tensiun media. Questa centrala furnescha electricitad als ospitals, las chasas da vegls, la citad veglia e la regiun enturn staziun. La centrala sto vegnir remplazzada ord motivs da vegliadetgna.

Purtret da la plazza da gieu.
Legenda: La plazza da gieu en la chantunada stuess vegnir serrada per in onn. RTR, Lea Livers

Damai ch'il plaz na tanscha betg al lieu ch'els èn uss vulan els midar en il chantun tranter la via da Masans dal Quader. La plazza da gieus vegniss serrada durant in onn. Quest project custass radund 20 milliuns francs che l'IBC finanziescha.

La stad 2017 duain las lavurs da construziun cumenzas, il 2018 duain quellas esser a fin. Il bajetg nov da l'IBC na saja betg malsegir pervia da radiaziun. Quai vgnia tut protegì bain. Ils plans publics per la construcziun sutterrana vegnan publitgads uffizialmain il mars.

Visualisaziun da la chasa.
Legenda: L'Inventx bajegiass da nov ina chasa en la «Steinbruchstrasse» visavis la chasa RTR. MAD

Inventx bajegia sin l'areal da l'anteriur lavuratori forestal

Gia la fin matg ha la Citad orientà davart ina cunvegna per planisar cun la fatschenta dad IT renomada Inventix. L'Inventx ha il mument radund 140 collavuraturs. La fimra è creschida fermamain ils ultims onns. Il nov bajetg duai pussibilitar da crescher vinavant. La firma vul porscher plazzas per radund 200 persunas.

Er intginas abitaziuns sajan previsas en quest bajetg nov. La preschentaziun detagliada dal project è prevesida per la primavaira 2017. L'ultim pled en chapitel ha la finala il suveran da Cuira.

Er per l'archiv datti ina schliaziun

L'archiv da la citad da Cuira cumbatta gia dapi blers onns cun problems da plaz. Cun il nov bajetg da l'Inventx fiss er quest problem schlià. Il bajetg nov lubiss da construir stanzas specialmain adattadas per archivs. La citad planisescha in contract da fittar cun l'opziun da cumprar. Tut tenor la decisiun dal cussegl communal sto era vegnir votà davart quest contract.

RR novitads 14:00