Siglir tar il cuntegn

Ulteriur Grischun Cuira: Damain chartun malgrà onlineshopping

Ils ultims 6 onns han ils lavurers commnals da Cuira rimnà adina pli u main tuttina bler chartun cun 1000 tonnas ad onn. Avant 10 onns rimnavan els schizunt anc 100 tonnas dapli per onn.

Legende: Video Betg dapli chartun a Curia malgrà onlineshopping abspielen. Laufzeit 3:10 Minuten.
Dals 11.04.2016.
Da san.: Cherry Lloyd, Leo Senti, Reto Gruber e Gino Lo Bartolo
Legenda: «Umens da palperi e chartun a Curia» Da san.: Cherry Lloyd, Leo Senti, Reto Gruber e Gino Lo Bartolo RTR, G. G. Flepp

Tenor il schef dal lavuratori communal da Curia, Reto Gruber saja la raschun ch'i na vegnia betg rimnà dapli chartun da chattar en l'economia privata.

I dettia bleras fatschentas e persunas privatas che rimnian er chartun e quai adina pli savens. Il quantum che quellas rimnan n'èn savens dentant betg registrads en ina statistica. Uschia resti pli pauc per la citad ed er pli pauc en la statistica.

Exportar è attractiv

Che la fiera da palpiri e chartun vegl è attractiva er per privats, conferma er Beat Kneubühler da l'uniun Recicladi Palpiri + Chartun. Cunzunt l'Asia importeschia fitg bler palpiri. L'Europa exportescha per exempel dus terz dal palpiri e chartun vegl en China. Ed er autras terras exporteschan mintg'onn milliuns tonnas.

Onlineshopping dovra stgatlas

Tenor Pascal Nufer, il correspondent dad SRF a Shanghai, cumpran ils Chinais enorm bler online. Schizunt il pac schlogns vegnia empustà online. E per trametter tut quai dovri bleras stgatlas. Rodund 10 milliardas stgatlas tramettan ils Chinais mintg'onn cun la posta u cun il currier.

Fiera da stampa è gronda malgrà smartphone e tablet

Sco er tar nus en Svizra consumeschian er adina dapli Chinais, medias be pli via smartphone u vial tablet. Tuttina saja la fiera per gasettas e cudeschs anc fitg gronda tar ina populaziun da 1,3 milliardas, uschia Nufer vinavant. Ultra da quai stampa la China er bler per l'entir mund. Ina singula stampari haja per exempel er gia producì 25 milliuns biblas.