Cuira: Biblioteca po far midada en il bajetg da la posta

Ussa èsi defitiniv. Las bibliotecas Arcas ed Aspermont a Cuira survegnan in nov da chasa e quai en l'anteriur bajetg da la posta a la via Gäuggeli 1 a Cuira.

Anteriur bajetg da la posta a Cuira.

Legenda da maletgs: Bainprest po la biblioteca far midada en l'anteriur bajetg da la posta. RTR,Fabia Caduff

Il contract da locaziun saja sut tetg. Quai ha confermà la citad da Cuira en ina communicaziun da medias. La citad da Cuira ha suttascrit cun la possessura dal bajetg, la banca Credit Suisse, in contract da locaziun da 20 onns. Probablamain po la biblioteca retrair las localitads da var 1'000 m2 il prim d'avrigl 2018.

Cunquai ch’il bajetg haja ‘interess public’, saja la Credit Suisse cuntenta d’avair chattà questa soluziun. Quai di Andreas Roth da la CS. Era il cussegl da la citad da Cuira è fitg cuntent ch'ins haja uss pudì suttascriver il contract. Gia cun la decisiun da la serrada da la posta 2, era l'access al bajetg per la publicitad la finamira dal cussegl da la citad. La biblioteca nova duai era rinforzar il center da la citad.

En il bajetg vegl da la posta vegnan ils differents lieus da la biblioteca da la citad, da la ludoteca e da la biblioteca interculturala integrads ad ina purschida moderna ed attractiva. Previs è era in restaurant ed in uffizi da posta integrà. Cun las mesiras da construcziun vegn l'infrastructura dal bajetg adattada als basegns dals novs locataris e medemamain mantegnì il caracter dal bajetg ch'è sut protecziun da monuments. Cun la restauraziun vegn entschet la primavaira respectivamain la stad 2017.

RR actualitad 06:00