La crudada da crappa è stada en la val Scalära al cunfin da las vischnancas da Cuira e Trimmis, para saja era stà da vesair ina nivla da pulvra. Sinaquai hajan pliras persunas telefonà a la polizia chantunala, scriva l'agentura da novitads svizra SDA suenter avair discurrì cun il pledader da la polizia Martin Walser.
La crappa saja sa distatgada da las spundas dal Montalin, in piz da 2'266 meters autezza gist sper Cuira.
Auter che chasas da vacanzas na dettia quai nagut en la vallada, la polizia sclereschia uss ensemen cun l’uffizi per guaud e privels da la natira la situaziun. Enfin ussa na sappian els betg dapli, citescha l'agentura da novitads il pledader da la polizia.
Privel da bovas enconuschent
Gia l’onn 1964 aveva il chantun construi in batschigl per retgnair il material che pudess vegnir or da la val Scalära tar la uschenumnada «Scalärarüfe». En il medem batschigl sbucca er la «Maschänserrüfe».
Per tegnair en frain bovas da questas duas vals aveva il chantun realisà il 2005 per 2,5 milliuns francs in batschigl grond, scriva el en la publicaziun da l’Uffizi da construcziun bassa Nr. 65 l’onn 2005.
Quel batschigl ha da proteger las lingias da traffic principalas en la Val dal Rain, illustrescha la fotografia correspundenta en la publicaziun da l'uffizi:
Dapli suonda.
RR novitads 17:00