Siglir tar il cuntegn
Inhalt

Ulteriur Grischun Concurrenza tras bus - er tar la Viafier retica in tema

Tenor il cusseglier dals chantuns e president dal cussegl d'administraziun da la Viafier retica, Stefan Engler, saja anc memia baud da respunder la dumonda sch'ils bus èn propi ina concurrenza. Però pudessan els daventar quai en l'avegnir, tut tenor decisiun da l'Uffizi federal da traffic.

tren da la Viafier retica dasper in bus dad Eurobus
Legenda: Anc n'èsi betg cler sche la Viafier retica survegn concurrenza entras purschidas cun bus, ma il tema fatschenta. Keystone e swiss-image.ch

Stefan Engler vesa duas varts vi da las novas purschidas cun bus: Quels che vegnan da l'exteriur en Svizra, pon tenor el er esser d'avantatg perquai ch'els portan forsa era giasts en il Grischun che viagian suenter vinavant cun la Viafier retica.

Lingias a lunga distanza entaifer la Svizra fan quitads

Pli sceptics è il president dal cussegl d'administraziun da la Viafier retica envers las dumondas dad Eurobus e Domo Reisen ch'èn actualmain pendentas tar l'Uffizi federal da traffic. Quellas interpresas han numnadamain dumandà per ina concessiun (lubientscha) da far viadis entaifer la Svizra. P. ex. tranter Turitg, Cuira ed il Vallais u er tranter Cuira e Tavau. Trajects nua ch'era la Viafier retica porscha colliaziuns.

En mitga cas vulessan nus, sch'i vegniss ina giada tar quella concurrenza, esser fits da metter ina buna offerta sin maisa.
Autur: Stefan Englerpresident dal cussegl d'administraziun da la Viafier retica

Tgi survegn las ivettas?

Sch'ils bus daventan ina concurrenza per la Viafier retica u betg dependa tenor Stefan Engler ferm da la dumonda sche las interpresas pon piclar or il meglier. Vul dir: porscher viadis sin ils trajects il pli frequentads e durant ils megliers temps.

En questa dumonda ha l'Uffizi federal da traffic enta maun las mastrinas cun dar u betg dar la concessiun. La lescha perscriva be che las novas colliaziuns na dastgan betg concurrenzar marcant purschidas existentas, tant privatas sco finanziadas dal maun public. Ma la definiziun da marcant e fitg vasta.

Exempel da l'Uffizi federal da traffic

Vul ina fatschenta per exempel porscher duas colliaziuns a di tranter Cuira e Lugano na saja quai betg ina gronda concurrenza per exempel per ils Autos da Posta. Sch'ella veglia però porscher in tact d'ina ura, lura bain. E la fatschenta na survegniss per consequenza betg la concessiun.

Las medemas prescripziuns

Quai che pertutga las prescripziuns valan per las interpresas da bus las medemas sco per la viafier ed autras fatschentas da transport. Tar viadis entaifer la Svizra vala il dretg svizzer, las interpresas ston porscher las medemas prestaziuns socialas, ademplir ils medems standards da segirtad sco p. ex. ils Autos da Posta u er acceptar tant l'abunament general e quel da mesa taxa.

Ord l'archiv


Legende: Video Il budget pitschen prenda il bus abspielen. Laufzeit 01:13 Minuten.
Or da Nouvo RTR dals 11.03.2017.

RR actualitad 12:00