Siglir tar il cuntegn
Inhalt

Ulteriur Grischun «China siemia da Tschiertschen»

A Tschiertschen vegn renovà il hotel Alpina che ha passa 100 onns. Dentant, co carmalar osps en il Scanvetg, en in temp ch'il turissem grischun patescha dal ferm franc svizzer?

Legende: Video The Alpina – Milliuns Asiats per in nov Hotel Alpina abspielen. Laufzeit 02:47 Minuten.
Or da Actualitad video dals 10.07.2015.
chombra da hotel
Legenda: Ina chombra renovada dal hotel Alpina. RTR, A. Hendry

Grazia ad ina reportascha da 10 paginas en in magazin da luxus chinais èn tut las chombras reservadas il temp da Nadal, e quai avant ch'il hotel ha insumma avert. L'interess dals Chinais saja nunditg, di Peter Knobel, commember dal cussegl d'administraziun. Per els saja Tschiertschen in lieu sco la patria da Heidi. Uschia s'imagineschian ils Asiats la Svizra.

Possessur investescha 15 milliuns

15 milliuns investescha il possessur Ah King Teo en il hotel. Quel vegn renovà uschia ch'el survegn enavos il scharm da l'entschatta dal 20avel tschientaner, dentant cun las cumadaivladads dad oz, per exempel in spa per far wellness.

Il hotel vegn avert il december 2015

Cun ina tala purschida na saja quai betg difficil d'emplenir ils 60 letgs, di Peter Knobel. Pli gronds sforzs dovria quai per occupar ils plazs dals restaurants, da quels dettia quai numnadamain dapli che letgs per osps.

Il hotel «Alpina Mountain Resort & Spa» a Tschiertschen vegn avert il december 2015.

Attracziun supplementara per ils osps

La stad èn las sutgeras da las pendicularas da Tschiertschen serradas. Il hotel vess dentant gugent, sche almain ina sutgera fiss averta, per ch'ils turists possian passentar in mument en la natira. Martin Weilenmann, president dal cussegl d'administraziun di dentant, che quai na saja betg pussaivel. Quai custia bler da memia.

L'investur e possessur dal hotel "Alpina Mountain Resort and Spa" na lessi betg sustegnair finanzialmain las pendicularas, di Peter Knobel dal cussegl d'administraziun dal hotel. Il hotel e las pendicularas hajan differentas incumbensas.

Dal medem maini è era Martin Weilenmann. Sch'il hotel vegnia cun glieud e las pendicularas porschian in territori da skis attractiv, lura profiteschian omaduas instituziuns ina da l'autra.

Las pendicularas, il hotel e la vischnanca sajan vi dad tschertgar sliaziuns per pudair avrir ina sutgera la stad.

Pendicularas cun problems finanzials

Pervi d'in enviern magari miserabel èn las pendicularas da Tschiertschen vi da tschertgar agid finanzial. Perquai han ellas dumandà acziunaris ed osps regulars per daners. Tenor Martin Weilenmann, president dal cussegl d'administraziun, èn ils 300'000 francs sin buna via.

Cun quels daners vulian ins sanar ils runals e renovar las ustarias.