Siglir tar il cuntegn

Header

video
Stgaudar las vignas cun chandailas porta pauc
Or da Telesguard dals 22.06.2018.
laschar ir. Durada: 1 minuta 34 Secundas.
cuntegn

Ulteriur Grischun Chandailas gidan pauc

Las chandailas cunter la schelira en las vignas grischunas pon augmentar las temperaturas mo per 0,5° fin 1°, e betg sco spetgà per 2° fin 5°.

Las chandailas en las vignas grischunas n'han betg fatg l'effect spetgà. Quai mussan tests che l’Uffizi per la natira e l’ambient ha fatg il mars ensemen cun il post spezialisà dal Plantahof. Quai rapporta il schurnal regiunal da Radio SRF.

Las chandailas possian augmentar la temperatura en las vignas per mo o,5° fin 1°. Quest resultat saja frustrant, ha il cumissari da viticultura Hans Jüstrich ditg envers il schurnal regiunal. Spetgà avevan el ed ils producents da las chandailas ch'i saja pussaivel d'augmentar las temperaturas cun las chandailas per 2° fin 5°.

Ils viticulturs stoppian uss ponderar, sche quai cunvegnia anc da duvrar talas chandailas. Vitiers vegnia anc che la concentraziun da particlas finas haja surpassà il limit lubì pervi da las chandailas. Er quest effect n'aveva il cumissari da viticultura betg spetgà.

Sceptica tar furniturs e vendiders da las chandailas

Il schurnal regiunal dad SRF ha confruntà vendiders e furniturs da las chandailas cun ils resultats dal test. Quels din ch'i saja grev da dir insatge tar il cas concret cunquai ch'el n'enconuschian betg ils detagls da quels. La fatschenta Balthasar SA dal chantun Lucerna che producescha talas chandailas scriva al schurnal regiunal ch'i dependia fitg dal lieu nua che las chandailas vegnan duvradas. Vul di sche las vignas èn en ina foppa, en ina spunda u sch'i va ina bisa sche hajan las chandailas in'auter effect.

Christian Baumgartner che cumpra dapi onns en chandailas per la Landi è surstà dals resultats da test. El enconuschia divers cas nua che las chandailas hajan giu in effect positiv.

RR novitads 06:00

Artitgels legids il pli savens