Mintga classa ha creà ed elavurà in agen toc da teater cun agid d’in pedagog da teater. L’emprim stgalim superiur da Vella ha tematisà il president american Donald Trump, il consum da las medias e l’atgna identitad. Ils tocs cuzzan rodund 30 minutas e vegn trenà e provà cun resuns dad ina classa che sesa en il public.
Levgiament e variaziun
Tuts han tegnì endament il text, èn stads en il dretg lieu ed han gì plaschair da giugar teater. L’experientscha saja stada «coola», interessanta ed ina bella variaziun tar il mintgadi da la scola. E tuttina èsi era stà magari stentus da crear il toc e tegnair endament tut ils pleds. Emprendì insatge per la vita n’hajan els plitost betg, din scolaras e scolars.
Betg pli schenai
D’in auter avis è Marina Blumenthal, la pedagoga da teater, ch'ha elavurà il toc cun la classa. Ils scolars e las scolaras eran zunt schenads l’entschatta. Ussa hajan els fatg in grond svilup e sajan stads averts sin la tribuna. Quai possian ins era duvrar pli tard en la vita.
Sfurzar a la ventira
Durant la preschentaziun dals scolars da Vella hai dà en il public intgins scolars che n’avevan simplamain betg gust sin teater. Quai conceda era Loris Mazzocco, manader da project dal festival «Best» e manader dal giuven teater da Cuira, che ha organisà l’eveniment. E tuttina saja quai impurtant, ch'era quests giuvenils vegnian en contact cun il mund dal teater. Uschia sappian els almain, da tge ch’i discurrian, sch’els na veglian betg far u vesair in teater.
La gronda part dals scolars e da las scolaras saja dentant da la partida cun tschaffen, per elavurar ensemen in toc, lavurar cun corp, vusch, linguatg e simplamain esser averts.
RR actualitad 17:00