Bandiera fallada durant visita diplomatica

Sco la gasetta Suedostschweiz online rapporta la sonda, pendeva vid la chasa municipala da Cuira la bandiera dals Stadis unids sin la vart fallada. E quai durant la visita da l'ambassadura dals Stadis Unids da l'America en la chapitala grischuna.

La bandiera dals Stadis Unids da l'America vid la chasa municipala da Cuira. Las stailas èn giusut enstagl sissum.

Legenda da maletgs: La bandiera dals Stadis Unids da l'America vid la chasa municipala da Cuira. screenshot facebook Suzan LeVine

L'ambassadura dals Stadis Unids da l'America en Svizra, Suzan LeVine ha mess sin ses profil da facebook diversas fotografias da sia visita a Cuira da mardi, ils 6 da settember. Tranter quellas era ina nua ch'ins vesa ella accumpagnada da ses um Eric LeVine, il president da Cuira Urs Marti ed il scrivant da la citad Markus Fraunefelder. Sur els penda la bandiera dals Stadis Unids cun las stailas betg a l'ur sissum da la bandiera mobain a l'ur giusut.

L'ambassadura ha commentà quest maletg cun ils pleds: «It was so thoughtful of the Chur city government to put out the flag for us.»

Suzan LeVine cun ina blusa da bleras colur. Ella porta in chadaina da perlas e rintgas da perlas.

Legenda da maletgs: Suzan LeVine Keystone

«  Igl è stà plain resguard da la citad da Cuira da pender ora la bandiera per nus.

 »

Suzan LeVine
Ambassadura dals Stadis Unids da L'America en Svizra

Bandiera cuntraria: Capitulaziun

Ina bandiera pendida si sin il maun cuntrari munta durant conflicts armads la capitulaziun da quel che metta ora la bandiera. Tenor la lescha da la bandiera americana (United States Flag Code, en vigur dapi il 1942) astga quella plinavant vegnir pendida si fallà mo durant ina situaziun da crisa, uschiglio valia quai sco disfamaziun.

Il post da l'amassadura dals Stadis Unids sin Facebook