Siglir tar il cuntegn
cuntegn

Ulteriur Grischun Avertura da la pli lunga punt pendenta da la Germania

En in’autezza da 100 meters sur la terra maina la punt viandants sin ina distanza da 360 meters sur ina val en la regiun Mosel/Hunsrück – radund 80 km davent da Leibzig.

La punt impressiunanta cun il num Geierlay.
Legenda: La punt impressiunanta cun il num Geierlay. mad

Al cumenzament da las lavurs era la punt cun il num Geierlay schizunt la pli lunga da l’Europa. Dentant datti en l’Austria ina ch’è anc in zic pli lunga. Tuttina porta in project da talas dimensiuns bleras sfidas per quels che construeschan ella.

Nagins problems tar la construcziun

La Crestageo da Cuira ch’è atgnamain spezialisada sin lavurs da protecziun encunter privels da la natira ha gudagnà la concurrenza per las lavurs da construcziun. Tenor David Baselgia da la Crestageo saja il know how per gronda part il medem tar la construcziun da punts pendentas. Perquai n’haja quai lura er quasi betg dà problems tar la construcziun sezza.

Cunzunt sfidas organisatoricas

Las pli grondas sfidas sajan stadas organisatoricas, uschia David Baselgia. Ina da las pli grondas - la differenza da cultura sin il bajetg. En Germania giaja tut pli ditg perquai ch’ils plans giajan anc tras pliras instituziuns dal stadi avant che cumenzar a bajegiar. En Svizra perencunter haja l’inschigner la responsabladad per ses plans.

L’autra gronda sfida eran ils blers aspectaturs che vegnivan da tuttas uras e senza retegnientschas a guardar sin il plazzal.