Siglir tar il cuntegn

Header

cuntegn

Ulteriur Grischun Arosa: «Paradies» sa perstgisa per avis deplazzads

Cun plirs avis che sa drizzan directamain envers giasts gidieus provochescha chasa da vacanzas ad Arosa in veritabel «shitstorm». Cunzunt las reacziuns en l'Israel èn vehementas. Las medias socialas van surora. Il hotelier è para sa perstgisà.

audio
Bunura: Arosa – Shitstorm per placat cunter gidieus
ord Actualitad dals 16.08.2017.
laschar ir. Durada: 1 minuta 59 Secundas.

Pliras medias israelianas rapportan da las experientschas negativas dad ina famiglia gidieua en la chasa da vacanzas «Paradies» ad Arosa. Concret vai per ina seria dad avis titulads da las medias sco antisemitics.

Avis drizzads explicitamain als giasts gidieus

Sin via tar il bogn da la chasa da vacanzas cun pliras abitaziuns adressescha in avis explicitamain ils giasts gidieus cun la supplica da far la duscha avant e suenter far bogn. E sin la frestgera en la lobby stettia che giasts gidieus dastgian mo duvrar quel duas giadas a di per in'ura.

Critica e commentaris clers

Las reacziuns sin quests artitgels èn vehementas. In veritabel «shitstorm» è vegnì sur il «Paradies» ad Arosa. Las reacziuns en commentaris van fin a la pretensiun da boicottar hotels en Svizra – e dad arrestar il manager da l'hotel pervi da rassissem.

Tenor Federaziun da las communitads israelitas CH: «Inacceptabel»

Per Jonathan Kreutner, il secretari general da la Federaziun svizra da las communitads israelitas, è quest cumportament inacceptabel. Damai ch'il text s'adresseschia sulettamain als Gidieus, vegnian quels discriminads, ha ditg Kreutner a l'ediziun online da la «Südostschweiz». Da l'autra vart suttastritga el che la convivenza dad indigens e giasts gidieu-ortodoxs funcziunia da princip bain.

Hotel sa perstgisa per pleds «deplazzads»

Entant èn ils responsabels da la chasa da vacanzas sa perstgisads per la formulaziun che saja stada deplazzada – e cun punctuar che giasts gidieus sajan bainvesids en la chasa da vacanzas. Ins n'haja nagut encunter giasts gidieus, ch'ins retschaivia regularmain en il hotel, han ditg ils responsabels da l'hotel a l'agentura da novitads gidieua JTA. Ils avis avessian stuì esser drizzads vers tut ils giasts, e betg mo a las persunas gidieuas.

Arosa turissem: Star nà, curriger ed impedir ch'i sa repetia

L'appell ha consequenzas diplomaticas. Il departament federal per affars da l'exteriur EDA ha confermà ch'ins saja en contact cun l'ambassadur israelian.

Er Arosa Turissem ha reagì. Tenor directur Pascal Jenny na giaja quai insumma betg a prau cun Arosa. La formulaziun na saja betg acceptabla e na vegnia er betg tolerada. Ins vegnia a discutar ed elavurar il cas cun ils pertutgads, uschia Jenny vinavant. Ussa saja quai impurtant da star nà per il sbagl e da far tut che quest na possia betg sa repeter. La chasa «Paradies» vegnia segir ad emprender sia lecziun cun quest'experientscha.

RR novitads 14:00+

Artitgels legids il pli savens