Siglir tar il cuntegn
cuntegn

Ulteriur Grischun Arosa: Organisar letgs suenter il grond incendi

Il Posthotel ad Arosa era cudischà per 90% per la stagiun d'enviern. Suenter il grond incendi emprova Arosa Turissem ussa da chattar ora tgi che ha insumma fatg reservaziuns en l'hotel e da porscher in'alternativa als giasts. La raschun per l'incendi è anc intscherta.

Il maletg mussa il Posthotel ad Arosa en flommas.
Legenda: Ils 30 da december è il Posthotel ad Arosa ars cumplettamain. Keystone

Era intgins dis suenter l'incendi datti giasts – surtut da l'exteriur – che n'han udì nagut da l'incendi e che stattan cun lur valischas avant la ruina da l'hotel. Quels survegnian sco emprim in cafe e lura emprovia Arosa Turissem da chattar in suttetg per els, declera Pascal Jenny, il directur dad Arosa Turissem. Ils giasts svizzers hajan per gronda part udì da l'incendi e s'informeschian avant che partir per Arosa.

Anc nagina survista da las reservaziuns

Cunquai ch'il Posthotel è cudischà per 90% l'entira stagiun d'enviern, emprova Arosa Turissem ussa da chattar ora tgi che ha fatg tge reservaziuns era a lunga vista. Quai n'è dentant betg uschè simpel: Las datas pon ins reconstruir be per part sur il sistem da reservaziun.

Gronda solidaritad ad Arosa

Hoteliers, possessurs d'abitaziuns da vacanzas e persunas privatas sajan sa mussadas fitg solidarias suenter l'incendi dlas 30 da december ed hajan sa gidà cun chombras, vestgadira u daners per ils giasts ch'ins ha stuì evacuar. Quai hajan ils giasts stimà fitg, accentuescha Pascal Jenny.

Raschun per incendi anc betg clera

La raschun da l'incendi dal Posthotel ad Arosa n'è anc betg sclerì. Pervi dal privel che la ruina dal bajetg crodia ensemen, n'han ils investigaders anc betg pudì passar en il bajetg devastà. Quai ha fatg a savair la Polizia chantunala. Il fieu è rut ora il venderdi passà. Durant 36 uras ha il bajetg brischà. In um dad 85 onns che ha ina ferma tissientada da fim è anc adina en l'ospital. Ina dunna ed in uffant blessà han entant pudì bandunar l'ospital.

RR actualitad 17.00