Areal da la resgia gronda a Domat survegn ina nova fatscha

Cun il parc industrial Vial a Domat survegn l'areal da l'anteriura resgia gronda ina nova fatscha. Il chantun saja il mument en contractivas cun trais interpresas che mussan interess da sa domiciliar sin quest areal.

Laschar ir video «Areal da la resgia gronda a Domat survegn ina nova fatscha»

Areal da la resgia gronda a Domat survegn ina nova fatscha

2:41 min, Telesguard dals 3.10.2017

Tenor la regenza grischuna adempleschia l’areal d’industria las pretensiuns per in lieu d'industria attractiv per interpresas ch'èn activas internaziunal. L'emprima investidra la Hamilton Ems SA ha gia terminà la construcziun brutta da ses bajetg e grazia a la buna collavuraziun sa sviluppia la midada d’utilisaziun al parc industrial tenor ils plans, scriva la regenza grischuna. Uschia planisescha la Hamilton Ems SA da stgaffir 100 novas plazzas da lavur. L’edifizi duai esser a fin la primavaira 2018.

Project da generaziuns

Il chantun veglia sapientivamain laschar temp cun domiciliar interpresas novas ed uschia era dar paisa a la qualitad da questas interpresas. I sa tractia d’in project da generaziuns cun in potenzial per l’economia publica. Actualmain sajan ins vid contrahar cun trais interpresas. La Kamkorp Group da la Gronda Britannia haja gia mussà publicamain ses interess da sa domiciliar a Domat, scriva la regenza grischuna.

Va plaun va saun

Avant dus onns aveva il chantun cumprà il dretg da bajegiar cun la finamira da sviluppar ina zona d'industria. Lura aveva quai er anc dà in interessent grond ch'avess schizunt duvrà l'entir areal, numnadamain la firma da medicaments Biogen. Quella era lura dentant sa decidida dad ir a Soloturn, cunzunt er perquai ch'i saja là pli simpel da chattar lavurers qualifitgads. Uschia ha il chantun puspè stuì cumenzar tar nulla ed ha lura chattà la Hamilton che dovra uss dentant gnanc in dieschavel da l'entir areal che stess a disposiziun. Sper la Kamkorp Group da la Gronda Britannia dettia quai anc dus ulteriurs interessents, tgi che quai è na leva Jon Domenic Parolini il cusseglier guvernativ responsabel dentant anc betg tradir.

Areal da resgia anc adina vit

Sper quai tschertga il chantun anc adina in interessent per l'areal dad 80'000 meters quadrat ch'è anc adina reservà per ina resgia. Er qua dettia quai discurs cun interessents pussaivels, uschia Jon Domenic Parolini.

Chalur persa duai vegnir nizzegiada

Las interpresas che sa chasan sin l'areal duain pudair profitar da la chalur persa dals manaschis industrials vischins. La vischnanca da Domat ha per quest intent fundà ina societad per installar ina corporaziun da chalur Domat communablamain cun l’IBC Cuira e la Rhiienergie SA. Uschia saja in augment da la valur era en puncto provediment d’energia garantì, scriva la regenza grischuna.

RR novitads 10:00