Siglir tar il cuntegn

Header

Navigaziun

Vista sin il Rossboden a Cuira
Legenda: Sin il Rossboden a Cuira sto l'armada remplazzar ils magazins da muniziun existents. RTR
cuntegn

Ulteriur Grischun Approvà project per novs magazins da muniziun sin il Rossboden

L’armada po remplazzar a Cuira sin il Rossboden ils magazins da muniziun datiers dal stan da sajettar Rheinsand. Il Departament federal da defensiun ha approvà il project cun intginas resalvas.

Ils magazins existents na correspundan betg pli als standards necessaris per la segirtad da la truppa. Ed ils magazins sa chattian era memia datiers da chasas abitadas, scriva il departament. Perquai vul l’armada construir tschintg stanzas da muniziun ed ina stanza tecnica direct sper l’areal Rheinsand.

Il chantun ha prendì posiziun

En la consultaziun è il chantun Grischun vegnì tar la conclusiun, ch’il project na tangheschia betg ferm la planificaziun dal territori e l’ambient. Uschia na stoppian ils plans betg vegnir adattads, sco il Departament federal da defensiun scriva.

Betg resguardà resalva dal BAFU

Ina resalva da l’Uffizi federal d’ambient BAFU ha l’autoritad d’approvaziun refusà. Il lieu previs per il project saja giustifitgà ord ina vista generala, damai ch’ina alternativa che fetschia senn na saja betg da chattar sin la plazza d’armas a Cuira.

RR novitads 12:00