Cun 30 onns è la fiera da Nadal la pli veglia da tuttas durant il temp d'advent. La pli giuvna è cun il giubileum da tschintg onns la fiera dal bambin. Ed il terz giubileum festivescha l'organisaziun advent da Cuira cun il 10avel giubileum. A la festa d'avertura uffiziala il venderdi saira han blers laschà gustar in vin chaud, ma propi in'idea tge che sa zuppa davos ils nums da las fieras e da las organisaziuns n'avevan betg uschè blers.
Fiera da Nadal, dal bambin ed advent da Cuira – Tge è tge?
La fiera da Nadal è quella che ha mintgamai lieu l'ultima fin d'emna da november en la citad veglia. Preschentads vegnan surtut products ed ornaments per il temp da Nadal, savens fatgs a maun. Quella fiera cuzza be ina fin d'emna.
La fiera dal bambin è quella cun las chasettas, enconuschentas da bleras fieras dal bambin en diversas citads da l'Europa. En la via da la staziun avran las chasettas per part gia a partir da la fin november. La gronda part da la fiera è lura però en la citad veglia, quest onn a partir dals 6 da december.
L'advent da Cuira è l'organisaziun da marketing per tut las activitads durant l'advent en la citad principala dal Grischun. Là vai per vender las purschidas, organisar l'access cun il traffic public e coordinar tut.
President da la citad cuntent cun il svilup
Tenor il president da la citad Urs Marti è gia vegnì fatg bler per collavurar pli stretg ed igl è previs che la collavuraziun vegnia anc pli stretga. Fin che tut saja però sut in tetg, dettia quai anc in pau lavur.
El na vesia quai dentant era betg sco dischavantatg, sche la lavur saja repartida sin differents chaus. E la glieud na duaja era betg remartgar ina gronda differenza, mabain simplamain avair ina buna atmosfera e purschida durant il temp d'advent.
Tenor las reacziuns da divers visitaders para quai era gia dad esser gartegià. Per blers èsi simplamain il pli impurtant da pudair giudair in bun vin chaud e l'atmosfera da Nadal cun pignols, glischs e massa stans da fiera.
RR actualitad 07:00