Siglir tar il cuntegn

Header

cuntegn

Acziun da prevenziun ad Arosa SUVA fa frunt cun app cunter accidents sin pista

L'onn passà ha la SUVA registrà dapli accidents da sport d'enviern. Cun ina app fa ella ussa frunt ad ossa rutta e lioms stgarpads.

Grazia a la bell'aura en las muntognas è la tschajera en la Bassa han ils territoris da skis grischuns gì ina buna stagiun enfin ussa. Ma dapli glieud sin pista, quai munta era dapli accidents sin pista. Il territori da skis da Lai ed Arosa ha perquai lantschà ina campagna da prevenziun ed organisà in di cun la SUVA sin pista.

Far gust da duvrar l'app da la SUVA

Mesemna, ils 12 da favrer ha la SUVA gì in stan en il territori da skis dad Arosa. Cun grondas tavlas han collavuraturas e collavuraturs fatg attent sin l'app «Slope Track» che quinta la paisa ch'il corp sto purtar durant in di da skis. L'app è medemamain in trenader da fitness e sensibilisescha la skiunza u il skiunz per ses cunfins fisics. Finamira da l'app è da prevegnir ad accidents.

Dapli accidents da temp liber che da lavur

Vinavant ha la SUVA dà pled e fatg pertutgant ils d'accidents da l'onn passà. S'augmentads èn surtut ils accidents da sport d'enviern. La raschun è tenor la pledadra da medias Natascha Obermayr las bunas cundiziuns da l'aura da l'onn passà ch'hajan attratg dapli glieud.

En egl dat che la SUVA registrescha dapi in temp dapli accidents da temp liber che da lavur. Pli baud era quai il cuntrari, cunquai che la lavur saja stada pli privlusa ed ins avevia pli pauc temp liber.

RTR actualitad 08:00