7 plazzas da ballape per Cuira

La citad da Cuira prevesa el plan per l’areal da sport Obere Au tranter auter 7 plazzas da ballape, ina segunda halla da glatsch sco era ina halla d’eveniments e martgà. Avant dus onns aveva la populaziun da Cuira anc ditg stretg na ad in sumegliant project.

Laschar ir video «Cuira vul modernisar ed engrondir ils implants da sport Obere Au»

Cuira vul modernisar ed engrondir ils implants da sport Obere Au

2:05 min, Telesguard dals 8.6.2016

plan Obere Au

Legenda da maletgs: Il masterplan prevesa divers areals per sport ed occurrenzas sin la Obere Au. RTR

Questa giada vul ins dentant realisar il project senza debits ni in augment dal pè da taglia, ha communitgà la citad da Cuira. Avant dus onns era quai stà ils puncts dispitaivels. Ord quai motiv ha il president da la citad, Urs Marti, er ditg, ch'il «na» davant dus onns na saja betg stà in «na» da principi cunter novs implants da sport. Il masterplan saja quasi ils pals per far la saiv enturn l'entir areal. Tge che capita lura entaifer la saiv saja da realisar pass per pass.

Sco emprim vul il cussegl da la citad realisar ils projects da ballape e da glatsch. En in proxim pass suondan lura las adattaziuns vid ils bogns, ina chasa da parcar per passa 1'000 vehichels u era ina halla d'eveniments che duai la finala remplazzar la «Stadthalle» en la via da caserna.

Ussa ha il parlament da la citad da decider ils proxims pass.

RR novitads 12:00