60 onns partenadis da vischnanca cun Cuira

Quest onn festivescha la citad da Cuira ensemen cun lur tschintg vischnancas partenarias il giubileum da 60 onns. A quest’occasiun s’inscuntran ils presidents sco era en tut 120 giuvenils ed uffants en la chapitala grischuna. Els sa preschentant schizunt cun in Hossamobil a la parada da schlaghers.

6 bandieras a l'entrada da la chasa communala da Cuira

Legenda da maletgs: L'entrada en la chasa communala fa bainvegni a las vischnancas partenarias RTR, Selina Chistell

Differentas vischnancas grischunas han partenadis cun vischnancas dad auters chantuns, dad auters pajais u perfin dad auters continents. Per mintgina portan ils partenadis era auters avantatgs. Per ils ins è il barat cultural impurtant e per ils auters plitost il barat en dumondas turisticas.

Profitar sin differentas modas

Uschia è il partenadi da la vischnanca da San Murezzan cun Vail en l’America cunzunt impurtant perquai che omadus lieus han in territori da skis. Plinavant sa San Murezzan profitar da las experientschas che Vail ha fatg l'onn passà cun organisar il campiunadi mundial da skis.

La vischnaunca da Breil tgira in partenadi cun la vischnaunca tudestga da Gammelshausen. Là datti cunzunt in barat cultural. Ils da Gammelshausen han per exempel fundà ina musica da sturs suenter ch’els avevan emprendì d’enconuscher la societad da musica da Breil. Plinavant han els l'onn passà visità la stgargiada a Breil.

Cuira ha plirs partenadis

Pli che mo ina vischnanca partenaria ha la citad da Cuira che fa part ad in circul da partenadis cun tschintg autras vischnancas. Quai è ina vischnanca tudestga, ina taliana, ina franzosa, ina austriaca sco era ina dal Luxemburg. Quest onn s'inscuntran ils presidents dals vitgs e da las citads partenarias a Cuira per festivar il giubileum da 60 onns. Sper ils presidents fan era en tut 120 giuvenils part ad activitads da sport. Plinavon èn ils hosps dalla partida a la Schlagerparade e quai cun in agen «Hossamobil».