L’uniun da scolina Cuira transporta ils uffants en scolina e puspè enavos. Ils viadis per ils uffants èn differents, tgi ha mo duas minutas, tgi ha varga mes’ura per in viadi. Il factur decisiv è la ruta. Quella variescha mintga di, cunquai ch’il dumber d’uffants è mintga di in auter.
Avant ch’ils uffants arrivan da la scolina per ir cun il bus vers chasa, ha la chauffeusa Pierina Bischofberger da planisar la ruta. Cun ina buna ruta, sa lascha spargnar temp:
La chauffeusa, che ha sezza dus uffants, sa nua ch’ils pitschens passagiers han da sortir dal bus. Avant da partir studegia Pierina Bischofberger nua ch'igl è il meglier dad ir atras. Ruta directa u tuttina na?
Nua che las vias da Barblan e Giacometti sa cruschan, spetga il bus. Ord las duas scolinas vegnan ils uffants. Magari datti pitschnas surpraisas, ma Pierina Bischofberger na lascha betg disturbar e fa vinavant.
Igl vala uss da far appel, mirar che tuts sajan en il bus avant da parter. Tuts ch’èn sin la glista èn en il bus, uss po quai ir liber…
Igl è lugurus, sch'i va adina uschè ditg
Finalmein gentar! Ils gusts dals pitschens e las pitschnas èn magari differents, e magari spezials. Ils giuvens “gourmets” han bler fantasia:
Els èn pulit creativs, ils menus dils uffants da la scolina.
Igl n’è dentant betg mo il gust extraordinari che surprenda, mabain era la lingua. En il bus da la scolina vegn discurrì bunamain mo tudestg.
Quai è normal. Els discurran in cun l’auter mo tudestg. Schizunt quels che discurran a chasa rumantsch cun omadus geniturs, discurran en il bus pli bler tudestg che rumantsch.
La Lumneziana, ch’è mamma da dus uffants, na sa era betg segir daco. Forsa saja quai pervia da quai, ch’ils uffants creschan si a Cuira ed audan pli bler tudestg. Era ses uffants discurrivan adina tudestg en il bus. Engrevgiant saja era, ch’ils uffants hajan magari difficultads da chapir ils auters idioms. Pierina Bischofberger chatta quai donn, ch’i na vegn betg discurrì rumantsch en il bus.
Mo uss enavos tar il viadi. Ils uffants discurran e fan bain legher durant il viadi en il bus. Dentant propi dad aut na vegni betg. Ils scolarets sa cumportan bain, era sch’inqual è varga mes’ura en il bus. Tuttina dovri tschertas reglas ed in tschert urden, per ch’i restia quiet.
Il viadi dal bus da scolina ha in urari sumegliant a quel dal bus da la citad: Mintga trais minutas vegn fatg stazziun ed in uffant po ir a gentar. Il bus è vinavant bain en l'urari. Quai, schebain ch’i ha enturn mezdi bler traffic en l’entira citad da Cuira. E magari vegn lura era anc il tren d’Arosa tras la citad e blochescha il traffic. Ni ch’igl è da charrar plaun, perquai che la via è stretga ni che autos èn parcads agl ur da la via. Ma gronds retard na dettia quai tenor la chauffeusa strusch.
Normalmain cuzza il viadi da la scolina a chasa ni cuntrari maximalmain 40 minutas per viadi. Per ils uffants na para quest viadi betg ad esser in grond problem.