La nova halla vegn construida tar la chasa da scola Ried. Là datti schon duas hallas. Ina da quellas vegn dentant rutta giu ed en lez lieu vegn construida la halla tripla. Concret è planisà ina gronda halla ch'ins po partir en trais parts. Sut il tetg sa chatta era in traject da sprint, ch'ins sa era duvrar sco tribuna. La tribuna normala porscha plazza per 500 aspectaturs. En il bajetg sa chattan era 12 gardarobas: sis per quels tgi fan sport en la halla e sis per quels che fan sport dador.
La nova halla vegn a custar pli u main 15 milliuns francs. Quels surpiglia la vischnanca da Landquart. Il pe da taglia na sa vegn perquai betg ad auzar.
Dapi 30 onns en planisaziun
Tenor il president da la vischnanca, Sepp Föhn, studegian ins gia dapi 30 onns da construir ina nova halla da gimnastica. Dentant saja mintga giada vegnì insatge tranteren.
Il settember ha la populaziun da Landquart ditg «gea» ad ina nova halla da gimnastica. Dapi lura lavura la cumissiun da construcziun vid ils plans. En la cumissiun sesan sper il president communal era il mainascola Jürgen Thaler, il pedel Hans Furrer e Michael Holzinger, in represchentant da las uniuns da sport da Landquart. Cun ina tala schelta pon els adattar ils plans als basegns da la scola e dals sportists.
RR actualitad 17:00