lls Floating Piers en il lai d'Iseo en l'Italia, il Reichstag enzuglià en taila u era ils 3'100 paraplievgias ch'els han laschà tschentar si en il Giapun e la California – quai èn be trais dals projects dal duo d'artists Christo e Jeanne-Claude. Damai che sia dunna è spartida ha Christo referì sulet en il forum Würth. I dettia ni in manual ni reglas per descriver co sias ideas neschian.
Sch'ins guarda dentant sin tut nossas lavurs pon ins identifitgar tscherts elements ch'ins chatta adina puspè er en auters projects. Uschia per exempel in'enorma preschientscha dad aua e terra che s'entaupan.
Quai saja il cas tar la costa da mar en l'Australia ch'els han enzuglià cun taila, il Pont Neuf a Paris ch'è medemamain vegnida enzugliada cun taila, la Running Fence en la California (ina saiv da bunamain 40 kilometers lunghezza che finescha en la mar), las indesch inslas a Miami ch'èn vegnidas enramadas cun taila pinca u era ils floating piers en il lai d'Iseo – lungas punts oranschas sin las qualas ins pudeva perfin spassegiar enturn.
Trais milliuns dollars per trais mais Central Park
La realisaziun da las ideas sajan adina nunditg cumplitgadas, constatescha l'artist american ch'è oriundamain da la Bulgaria.
La pli stentusa part è da survegnir la permissiun. Nus stuain era prender a fit ils spazis per las installaziuns. A la citad da New York avain nus pajà trais milliuns dollars tschains per avair il Central Parc per trais mais. Nus avain era prendì a fit il lai d'Iseo, ilPont Neuf ed il Reichstag.
Il punct il pli decisiv è tenor Christo dentant la permissiun. Senza permissiun nagin project. «En ils 50 onns che nus avain lavurà avain nus survegnì la permissiun per 23 projects. 47 projects n'èn betg vegnids permess. Auters èn vegnids refusads u che nus avain pers l'interess vi dad els.» Quant grev ch'i saja d'obtegnair permiss variescha da stadi tar stadi. Ils Floating Piers avevan nagins tschabargals ed il lai ha ina profunditad da 200 meters. Uschia insatge n'avessian ins mai pudì realisar en Germania, di l'um dad 82 onns e ri.
Independenza totala grazia ad atgna interpresa
Las lavurs da Christo n'èn betg mo immens grondas, ma er immens charas – ellas custan normalmain plirs milliuns dollars. Finanziadas na vegnan ellas dentant betg da sponsurs u entras donaziuns, mabain dad in'interpresa ch'ils consorts avevan fundà. «Ella è vegnida creada per vender mias autras lavurs d'art per alura pudair realisar ulteriurs projects cun quests daners.»
Fotografias dals projects fin uss realisads, skizzas u auters objects na dastgan betg simplamain vegnir duvrads uschia. Entras quai sistem èsi gartegià a Christo e Jeanne-Claude da restar independents. Uschia posseda Christo oz sez la pli gronda part da sias ovras d'art.
RR actualitad 08:00