Siglir tar il cuntegn

Grischun Tren è pli bunmartgà ch’il bus

Dapi l'ultima dumengia cursescha per l’emprima giada in bus public tranter Cuira e Turitg, e quai duas giadas il di en mintga direcziun. In sguard sin las paginas d’internet dals dus concurrents mussa dentant: Savens è il tren pli bunmartgà ch’il bus.

Eurobus, il nov concurrenzt da las viafiers svizras.
Legenda: Eurobus, il nov concurrent da las viafiers svizras. Eurobus

Reagescha la Viafier federala sin quella nova concurrenza cun pretschs bass? En emprima lignia veglia la Viafier federala occupar meglier ses trens durant las uras betg uschè dumandadas, e perquai custia in bigliet che vegn cumprà online savens pli pauc ch’il pretsch normal, scriva il post da medias da la Viafier federala.

La firma Eurobus, che venda ses bigliets sur la pagina d’internet da Flixbus, vul observar bain, co ch’ils pretschs dal tren sa sviluppan en l’avegnir. Sche necessari vegnia reagì, scriva il post da medias da Eurobus sin dumonda da RTR.

Actualmain custa in viadi cun il bus da Cuira a Turitg 12 francs per viadi. Cun la viafier custa il viadi cun l’abunament da mesa taxa 20.50 francs, ils bigliets da spargn datti gia a partir da 6.20 francs.

RR actualitad 12:00