Ils davos 10 onns saja la populaziun da Tavau sa sminuida, scriva la vischnanca. En il medem temp sajan ils plazs da lavur dentant s'augmentads, e cunquai era il dumber da pendularis che vegnan a lavurar a Tavau. Actualmain sajan quai radund 1'200. Quels pudessan prender dimora en la vischnanca, sch'i dess avunda abitaziuns pajablas.
Perquai elavura la suprastanza – l'uschenumnà «Kleiner Landrat» – ina strategia d'abitar persistenta. Tranter auter vulan els metter il focus sin abitaziuns per famiglias, e sviluppar furmas d'abitar adattadas a la vegliadetgna. In terz da la populaziun da Tavau vegn ad esser sur 65 onns vegls en 10 onns – sch'il svilup va vinavant uschia.
Era persunas en scolaziun e stagiunarias dovrian abitaziuns pajablas. Per che quai funcziunia, na dovria betg mo mesiras da planisaziun dal territori. La vischnanca vul era mobilisar agen terren da bajegiar ed activar pli ferm sustegniments sco il Fonds per promover emprimas abitaziuns e mastergn.
