La Zenni Capital Partners è ina societad d’investiziun ch'investeschan en interpresas che n'èn betg a la bursa. Tenor il fundatur e CEO da la Zenni Capital Partners, James Zenni, tschertgan els interpresas cun potenzial da crescher, che n'han dentant betg chapital a disposiziun per far las investiziuns necessarias. En mira ha el interpresas da grondezza mesauna, per el èn quai interpresas che fan ina svieuta da maximal 100 milliuns dollars per onn. La Zenni Capital Partners cumpra da quellas interpresas, metta a disposiziun il chapital per las investiziuns necessarias ed emprova uschè da dar nov schlantsch a quellas interpresas.
Veglias vulps
Era sche la Zenni Capital Partners è vegnida fundada l’onn 2006, èn ils collavuraturs veglias vulps quai che pertutga investiziuns. La gronda part ha gia lavurà tar autras societads d’investiziun ed han ina gronda experientscha. La finamira è da realisar in gudogn constant sur plirs onns e cun pauc ristg. Perquai stoppian els era analisar fitg bain las interpresas ch’els vulan cumprar e planisar las investiziuns a lung temp. Tenor James Zenni na saja la finamira betg da puspè vender quellas interpresas suenter curt temp.
Plans per il Waldhaus
Il potenzial dal Waldhaus è tenor James Zenni, l'istorgia dal hotel, e questa istorgia vul el mantegnair. Bain renovar l’infrastructura nua necessari per cuntanscher il standard internaziunal per in hotel da 5* ed engrondir la zona da wellness, il caracter dal Waldhaus duai dentant restar intacts. Cun questa strategia duess il hotel avair success en il futur ed era carmalar hosps da l’entir mund a Flem.