Siglir tar il cuntegn
Inhalt

Surselva «Y» sco Yoga – Trin ha 9 posts da yoga en il percurs da fitness

Il percurs da fitness a Trin vegn revalità cun installar nov posts da yoga supplementars als 12 posts da fitness existents.

Ina da las plattafuormas per far joga, construidas datiers da la pista da currer.
Legenda: Ina da las plattafuormas per far yoga, construidas datiers da la pista da currer. RTR, Carlo Albin

Il percurs da fitness a Trin cun ina pista finlandaisa e differents exercizis da fitness è vegnì construì l’onn 1971. Il percurs è pia vegnì en ils onns, e perquai han ils responsabels da Trin turissem studegià tge far per dar nov schlantsch a questa purschida.

Suenter la visita d'in percurs da yoga construì en in guaud en l'Italia èsi stà cler: A Trin duai dar sin il percurs da fitness, sper ils posts da fitness, era posts per far yoga.

Pia Darms, la directura da l'Uniun da turissem Trin.
Legenda: Pia Darms, la directura da l'Uniun da turissem Trin. RTR, Carlo Albin

yoga per tuts

La finamira principala è tenor Pia Darms, la directura da l’Uniun da traffic Trin, da carmalar cun questa cumbinaziun da fitness e yoga novs giasts en vischnanca. Per che quai gartegia n'èn ils posts da yoga betg mo adattads per profis. Ina scolasta da yoga haja gidà els a definir ils lieus ed ils exercizis, i na dovria gnanc ina atgna matta da yoga per far ils exercizis.

Ils posts da joga èn marcads cun in “Y” da lain.
Legenda: Ils posts da yoga èn marcads cun in «Y» da lain. RTR, Carlo Albin

L’avertura dal nov percurs da fitness e yoga è planisada ils 17 da zercladur. Las grondas lavurs sajan fatgas, uss stoppian mo pli vegnir montadas las tablas che decleran ils exercizis, per che mintgin sappia era tge ch'i saja da far tar ils posts da yoga.

RR actualitad 07:20