Siglir tar il cuntegn

Header

video
Yannick Flepp trenescha per ils Worldskills a Salzburg
Or da Telesguard dals 24.11.2022.
laschar ir. Durada: 3 minutas 34 Secundas.
cuntegn

Worldskills 2022 In dals megliers electroinstallaturs dal mund vegn da Sedrun

Ils Worldskills èn il campiunadi mundial da mastergns. E mintgin che sa qualifitgescha per questa occurrenza lavura cun precisiun, premura e plaschair. Uschia era il giuven da Sedrun Yannick Flepp. La fin d’emna passada ha el gudagnà bronz a Salzburg en la categoria dals electroinstallaturs.

video
Insta-Live cun Yannick Flepp
Or da Giuventetgna dals 30.11.2022.
laschar ir. Durada: 14 minutas 45 Secundas.

La fin èn paucs pli sperts ed exacts che Yannick Flepp da Sedrun. L'electroinstallatur ha cuntanschì la medaglia da bronz tar il campiunadi mundial da professiuns a Salzburg. Tenor l'organisatur han ils participants stuì installar, reparar e mantegnair sistems da producziun industrials. Mo Hao Jiang da la China ed Edgar Monteiro dal Portugal èn stads megliers. L'um da 23 onns parta il terz plaz cun Yeongmin Kim da la Corea dal Sid e cun Ting-An Chien dal Taiwan. En tut ha el gì 18 contrahents da tut il mund.

Mument spezial da turnar cun la medaglia

Cu il mastergnant è turnà da Salzburg a chasa ha el sco emprim ruassà. La concurrenza è stada ferma e l'occurrenza fitg intensiva. Yannick Flepp na realisescha anc betg ch'el è turnà cun ina medaglia. El è dentant fitg loschs d'avair fatg il terz plaz e vesa questa prestaziun sco buna basa per ses futur.

Jau vegn anc a raquintar a mes uffants da quai.
Autur: Yannick Flepp terz als Worldskills a Salzburg

Uschia è Flepp sa preparà

L'onn 2020 aveva el gudagnà il campiunadi svizzer da professiuns ed è cunquai sa qualifitgà per il campiunadi mundial. Il mars 2022 ha el reducì ses pensum da lavur per avair dapli temp da trenar.

Il temp è mes pli grond concurrent.
Autur: Yannick Flepp electroinstallatur

Entaifer 9 mais ha Jannick Flepp trenà 1'000 uras. Cunzunt gieva per lavurar schuber, exact e spert. La pli gronda sfida è dentant stada il temp: Tar il campiunadi ha el stuì dumagnar ses pensum en 14 uras, en il mintgadi ha el temp 20 uras per la medema installaziun electrica.

Jau sun in perfecziunist. Per esser perfecziunist na basta il temp però betg. Uss sun jau daventà in optimist.
Autur: Yannick Flepp electroinstallatur

Cumenzà tar 0 tar il programmar

Betg mo la lavur pratica è impurtanta, mabain era quella cun il computer. Per che mintga apparat funcziuneschia, sto el programmar l'installaziun. Programmar è be stà ina pitschna part da l'emprendissadi e perquai ha el stuì cumenzar bunamain tar nulla. Sper il cumbat cunter il temp è il programmar la pli gronda sfida.

RTR Telesguard 17:40

Artitgels legids il pli savens