Walter Wittmann - in um, in pled

Il scienzià d'economia grischun Walter Wittmann è mort l’emna passada en la vegliadetgna da 80 onns e quai suenter lunga malsogna. El vegn a restar en memoria sco um che ha adina prendì posiziun e ditg ses maini cler, direct, senza resguard e magari era provocant.

Walter Wittmann è naschi ils 20 da december 1935 a Mustér. El ha alura studegià economia a las universitads da Friburg, Münster e Löwen. Il 1960 ha Wittmann promovì e trais onns pli tard ha el preschentà sia abilitaziun.

Ils proxims onns è Wittmann stà engaschà tar l’universitad da Friburg sco professer d’economia cun il focus sin las scienzas da finanzas e la politica d’economia svizra. Ils onns 80 è Wittmann stà commember da la cumissiun federala da cartel e president da la societad svizra per la retschertga prospectiva.

Engaschi en Surselva

Ils onns 60 e 70 è Wittmann era s'engaschà per il svilup economic e politic en la Surselva. L'onn 1966 è el stà commember da la gruppa «Pro Surselva» (l'antecessura da la Regiun Surselva) ed a Mustér è el stà l'emprim president da las pendicularas.

Terrada politica cun consequenzas tristas

Durant blers onns è Wittmann stà engaschà en diversas cumissiuns extra-parlamentaras da la Confederaziun. Uschia ha el vesì la colliaziun tranter economia e politica e survegnì gust e las ambiziuns per in engaschi politic. Il 1979 ha Wittmann candidà sco cusseglier naziunal per la PCD. La radunanza da delegads da la PCD chantunala ha lura dentant nominà Dumeni Columberg enstagl da Walter Wittmann.

Questa terrada haja lura gì consequenzas negativas ha ditg Columberg. Davent da lura haja Wittmann rut giu tut ses contacts cun Mustér e la Surselva. El haja prendì distanza da la muntogna e sa concentrà pli fitg sin temas da muntada naziunala ed internaziunala, uschia Columberg ch'aveva da giuventetgna intensiv contact cun Wittmann.

Wittmann ha scrit radund 50 cudeschs

Il 1998 è Wittmann emerità ma el è s’engaschà ed er s’exprimi adina puspè sur da fatgs d’economia e politica. L'ovra publizisitca da Walter Wittmann cumpiglia radund 50 ovras.

Las bleras da questas ovras han titels fitg pregnants, sco per exempel: «Das globale Desaster: Politik und Finanzen im Bankrott» (1995), «Der helvetische Filz» (2002), «Der nächste Crash kommt bestimmt» (2007), «Finanzkrise» (2009) ni «Staatsbankrott» (2010). Quai sulet intginas da sias publicaziuns.

RR novitads 18:00