Cura che la firma americana aveva surpiglià l'hotel da luxus a Flem èsi spert vegnì discurrì dad ina «americanisaziun» dal manaschi. Uss, in onn suenter la cumpra e quatter mais suenter la renovaziun, n'è quai betg il cas: Il hotel è in hotel internaziunal e betg in hotel american.
«Renovaziun precauta»
La renovaziun, sco quai ch'ella sa presenta uss, mussia ch'i saja vegnì lavurà cun precuaziun, ha detg l'anteriur directur da l'hotel, Jo Müller. Müller, che maina uss il museum da l'Hotel Waldhaus, raquinta, che la colur nova da l'hotel correspundia atgnamain a la colur originala dal 1900.
142 suitas e 180 collavuraturas e collavuraturs
Tut las 142 suitas e chombras èn vegnidas renovadas cumplettamain. Ellas sa chattan en il Grand Hotel, la Villa Silvana ed il Chalet Belmont. Quatter restaurants, in Spa da 2’800 meters quadrats ed il pli grond parc d’hotel en Svizra tutgan medemamain tar la chasa da luxus.
Tenor il directur da l’hotel, Peter Schoch, procuran 180 collavuraturas e collavuraturs per il bainstar dals giasts. Il cumplex d’hotel tutga dapi in onn a la societad americana Z Capital Partners.
Finanzià er cun il tripticon da Giacometti
Ina part da las investiziuns da 40 milliuns èn vegnidas finanziadas cun la vendita dad in’ovra d’art unica or dal possess da l’hotel, scriva l'agentura da novitads svizra SDA. I sa tracta dal tripticon «Panorama da Flem» da l’artist Giovanni Giacometti. In collecziunader svizzer aveva cumprà l’ovra la stad passada per 4,05 milliuns francs.
RR novitads 17:00