Siglir tar il cuntegn

Surselva Vuorz: L'hotel Ucliva ha ina nova suprastanza

A la radunanza dals 21 da matg è la suprastanza da la Corporaziun Ucliva sa retratga. Nov decidan sis persunas cun il president Daniel Blumenthal da Vella la strategia.

Beatrice Alder, Heinz Wiher, Helen Issler, Peter Rapp, Antonia Alig (da sen.) Daniel Blumenthal manca.
Legenda: Beatrice Alder, Heinz Wiher, Helen Issler, Peter Rapp, Antonia Alig (da sen.) Daniel Blumenthal manca. RTR, H. Giger

Co sanar e finanziar l'infrastructura

Cun Blumenthal èn Beatrice Alder da Basilea, Antonia Alig da Pigniu, Helen Issler da Tuirtg, Peter Rapp da Basilea e Heinz Wiher da Wädenswil vegnì elegì en suprastanza. Ina incumbensa che la radunanza ha dà ad els è dad examinar, tge pussaivladads ch’i dat da sanar e finanziar la tecnica da chasa, l’abitaziun dal fittadin, la cuschina etc. Il stgaudament custass – tenor calculaziuns dad ina gruppa da lavur – ca. 300’000 francs. Cler è dentant che la suprastanza na dastga betg vender chombras da l’hotel; laschar a tschains ubain acquistar ina chombra per in tschert temp fiss dentant ina varianta.

L'hotel Ucliva
Legenda: L'hotel Ucliva RTR, H. Giger

Hotel per famiglias, seminaris e cultura

L’hotel vegn avert uffizialmain ils 2 da zercladur da las 17.00 cun in aperitiv e musica per giasts ed amitgs. La fittadina è Ursula Wilhelm. Ella haja cumenzà l’avrigl a lavurar; i saja quai da schubregiar, registrar l’inventari, far las emprimas reservaziuns, organisar collavuraturs etc. L’Ucliva duai daventar in hotel per famiglias, per seminaris e curs e per eveniments da cultura.

RR actualitad 07:00