Siglir tar il cuntegn

Surselva Vuorz: Hotel Ucliva n'è anc betg salvà

Il quint annual da la Corporaziun Ucliva mussa ina bilantscha negativa. La sperdita da bilantscha fa 614’280 francs; l’agen chapital munta a minus 315’649 francs. I saja stà in grev onn, di il president da la corporaziun Daniel Blumenthal da Vella.

L'hotel Ucliva
Legenda: L'hotel Ucliva RTR, H. Giger

La situaziun finanziala saja stada fitg nauscha, di Blumenthal. Mo grazia al sustegn dals commembers da la Corporaziun Ucliva (cun donaziuns da 75’400 francs e cun signar scrits da participaziun per 48’600 francs) hajan els pudì manar vinavant l’hotel. Per meglierar la situaziun finanziala han ins era decidì da laschar a tschains intginas chombras da l’hotel (durant 30 dis ad onn per 5 fin 10 onns).

Concept, co meglierar la situaziun finanziala

Vitiers vegn l’agid da la Banca Chantunala Grischuna e da la societad per credits dad hotel. Ellas desistan durant in onn da las amortisaziuns. Mo persuenter pretendan ellas che la corporaziun preschentia in concept, co ch'ins veglia meglierar la situaziun finanziala. Era il post da revisiun fa attent a la situaziun da liquiditad critica.

Remplazzar il stgaudament

Dentant dovra la corporaziun daners per remplazzar il stgaudament ch'è vegnì installà il 1996. Tenor ina proposta duessi dar in stgaudament cun pellets, e quel custass 300’000 francs.

Radunanza dals commembers da la Corporaziun Ucliva
Legenda: Radunanza dals commembers da la Corporaziun Ucliva RTR, H. Giger

Curs, seminaris ed occurenzas da cultura

In aspect positiv è dentant ch'i è reussì da manar l'hotel dapi la reavertura il zercladur 2017. Sco la directura Ursula Wilhelm ha ditg envers RTR veglia ella era posiziunar l’hotel sco lieu che porscha curs, seminaris ed arranschaments da cultura cun litteratura, musica ed art. Per promover questa idea han ins fundà il favrer passà l’uniun «Cultura Vuorz/Waltensburg».

RR novitads 11:00